Америкийн Бостонд байдаг “XenoTherapeutics” биотехнологийн компани генетикийн өөрчлөлтөд оруулсан гахайн арьсыг хүний биед шилжүүлэн суулгах туршилт хийх зөвшөөрөл хүсчээ. Энэ бол хүн төрөлхтөн тун удахгүй биеийнхээ арьсны түлэгдсэн, өвчилсөн газарт гахайн арьсыг нөхөн суулгадаг болно гэсэн үг ажээ.

Арьс бол хүний биеийн хамгийн том төдийгүй маш чухал үүрэг гүйцэтгэдэг эрхтэн. Ус, электролит болон бусад аминдэм, шим тэжээлийг агуулж хүний биеийн дархлааны тогтолцоог бүрдүүлдэг. Мөн усны нэгдэл агуулж, биеийн температурыг хадгалдаг. Хүн арьсаа хүнд гэмтээхэд бие эрхтний үйл ажиллагаа доголдох, үхлийн халдвар авах эрсдэл нэмэгддэг байна.

Арьс нөхөх, шилжүүлэн суулгах хагалгаа арьсаа хүнд гэмтээсэн өвчтнүүдэд эдгэхэд нь туслах зорилготой. Одоогоор бие эрхтнээ донор болгохыг зөвшөөрсөн нас барагсад, хэт их таргалалтын дараа арьсаа татуулсан хүмүүсээс үлдсэн арьсыг уг хагалгаанд хэрэглэж байна.

 

 

“XenoTherapeutics” компани гахайны арьсыг хүнд бүрмөсөн биш эдгэж, шинэ арьс төлжих хүртэл түр хугацаанд суулгаж дархлааг хадгалах зорилготой юм.  Гахайн арьснаас хүний арьсанд байдаггүй сахар ялгардаг. Үүнийг генетикийн аргаар зогсоосон байна.

Эхлээд хүнд түлэгдсэн болон арьсаа гэмтээсэн зургаан өвчтөнд гахайн арьс түр суулгах хагалгааг Массачусетсын Ерөнхий эмнэлгийн эмч мэргэжилтнүүдийн тусламжтайгаар хийхээр төлөвлөжээ. Шинэ он гарсны дараа туршилтыг үргэлжлүүлж, клиникийн түвшинд хэрэглэж болох эсэхийг нь шийдэх юм.

Энэ мэтчилэн амьтны эд эрхтнийг хүний биед турших санал санаачилга үргэлжилсээр байна. Бразилийн эрдэмтэд загасны арьсыг түлэгдсэн арьсыг төлжих хүртэл түр ашиглахаар судалж байгаа бол Германы эрдэмтэд сармагчинд гахайн зүрх суулгасан нь хагас жил орчим насалжээ.

 

Эх сурвалж: www.qz.com

---