Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна. 

УИХ-ын гишүүн Д.Рэгдэл:

-Айл өрхүүдийн дулаан алдагдлыг бууруулна гэж байна. Амины орон сууцуудыг орхисон байна. Гэрийг дулаалснаас илүү үр дүнтэй гэж бодож байна. Нийслэлийн засаг даргын дэргэд тусгай сан байгуулагдах уу? Дүүжин тээвэр түгжрэлийг бууруулахад ямар ач холбогдолтой вэ? Хийн түлш хэрэглэсэн урамшуулалд хэдэн төгрөг зарцуулах вэ?

Нийслэлийн засаг дарга Х.Нямбаатар:

-Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах анхдагч хуулийг 2023 онд баталсан. Гэсэн ч энэ хуульд нэмэлт өөрчлөлт хийх зайлшгүй шаардлага үүссэн. Газрыг дахин төлөвлөх гэр хорооллын сан байгуулах нь энэ хуулийн амин сүнс. Улаанбаатар хотын хүн ам 2000 онд 700 мянга байсан өнөөдөр 1сая 800 мянга болсон. 804 мянган авто машин зорчиж байна.

Иймд бид одоогийн гэр хорооллуудыг хэрхэн орон сууцжуулах вэ гэхээр урт хугацаатай зээл тусламжаар баригдаж байгаа орон сууцуудыг зарж борлуулсан мөнгөөр газар чөлөөлөлтийн сан үүсгэж, хэсэгчилсэн ерөнхий төлөвлөгөөний дагуу газрыг нь худалдаж авах сан бий болгох гэж байна. Гандан, Телевиз, Эх нялхас зэрэг хотын төвтэй ойр байгаа байршлуудад "Дулаан баатар" төслийн хүрээнд дулаалж, хийн болон цахилгаан түлшинд шилжүүлэхээр байгаа. 51 мянган айлыг хийн түлш, цахилгаан түлшээр хангахад жилд дунджаар 90 тэрбум төгрөгийн татаас олгохоор байна.

Дүүжин тээврийн төслийн суурь багана цутгагдаж байна. 2026 оны гуравдугаар сард хөдөлгөөнд орж, зургаан сар туршина. Цагт 4800 хүн тээвэрлэнэ гэв. 

---