“Үл хөдлөх хөрөнгөө өмнө авсан үнээс нь бууруулж зарж болохгүй” гэдэг нь Үндсэн хууль зөрчсөн гэх дүгнэлт гарсан талаар хуульч О.Батхүү мэдээлэл хийв. 

Хуульч О.Батхүү: 

-Үндсэн хуулийн цэцийн дунд суудлын хуралдаан өчигдөр болж, шийдвэрээ гаргасан. УИХ-д 24 цагийн дотор хүргүүлэх хуультай. УИХ цэц дүгнэлтийг хүлээн авах бол энэ хуулийн үйлчлэл зогсоно. Харин хүлээж аваагүй тохиолдолд их суудлын хуралдаанаар шийдвэрлэх ёстой.

Энэ хуулийг татвар авах зорилгоор баталсан. Та өөрийнхөө 100 сая төгрөгөөр авсан байрыг мөнгөний шаардлага гаргаад 85 сая төгрөгөөр зарах ямар ч бололцоогүй болсон. Ашиглахаа больсон үл хөдлөхөө зарж, эргэлтэд оруулъя гэхээр улсын бүртгэл нь бүртгэж авдаггүй. "Яасан бэ?" гэхээр та заавал наадахаа өндөр үнээр зар гэдэг. Энэ бол хүний эрхийн хамгийн том зөрчил. Би өөрийн өмчөө хэдээр ч зарж болно шүү дээ. УБЕГ-т өдөрт 80-90 хүний өргөдлийг буцаадаг байгаа юм. Маш том хүний эрхийн зөрчил. Энэ нь Монгол Улсын эдийн засгийн боомилж байгаа хэлбэр юм. Үүнээс болоод банкны барьцаанд байгаа орон сууц, үл хөдлөх хөрөнгө зарагдахгүй байна. Энэ хуулиас болоод Хөгжлийн банк, Нийгмийн даатгалын сангийн асуудлаар хураагдсан хөрөнгүүд зарагдахгүй байна.

Иргэдэд одоо энэ хуулийн үйлчлэл зургаадугаар сарын 6-наас түдгэлзсэн байгаа. Өмч хөрөнгөө зарах хүмүүс зарж, эргэлтэд оруулах боломжтой гэдгийг хэлмээр байна.

УИХ-ын гишүүдэд хандаж уриалахад хүний эрхэнд халдсан, зах зээлийн эдийн засгийг боомилсон хуулийг хүчингүй болгоод өгөөрэй гэж хүсмээр байна гэв. 

---