Ахмадууд тэтгэврийн зээлтэй холбоотой асуудлаар мэдээлэл хийв. Тэдний зүгээс тэтгэврээ 100 хувь авахыг хүсэж байгаагаа илэрхийлж, саналыг хүлээн авахгүй бол даваа гаргаас тэмцлийн өөр хэлбэрт шилжинэ гэв.

Ахмадын төлөөлөл:

-Бидний тэтгэврийг боомилж эхэлсэн учраас бид 6.16-наас суулт зарлаж эхэлсэн. Өмнө нь 12-36 сарын зээлээ авч болоод байсан. Өөрсдөдөө хэрэгцээтэй зээлээ аваад амьжиргаандаа зарцуулаад яваад байдаг байсан. Ахмад настнууд үр хүүхдэдээ өр үлдээхийг үнэхээр хүсэхгүй шүү дээ. Бидний тэтгэврийн зээл нь инфляцад нөлөөлсөн гэдэг худал. Бид судалж үзсэн тэтгэврийн зээлээс болдоггүй юм билээ. Гадаадын улс орнуудад тэтгэврийн зээлийг тусгай зээл гэж нэрлэдэг. Чөлөөтэй, бага хүүтэйгээр зээл олгоод зөв бодлого явуулдаг. Төр засаг нь ахмадуудаа харж үздэг. Харин манайд эсрэгээрээ байдаг. Бид тэтгэврийн зээлийг тэглээд өг гэж хэзээ ч хэлж байгаагүй. Өөрсдөө л гаргасан шийдвэр. Монгол банк, салбар яам ахмадууд хамтраад ширээний ард суумаар байна. Ахмадууд бидний энэ асуудлыг маргаашийн дотор шийдэж өгөхийг хүсэж байна. Хэрвээ бидний саналыг хүлээн авахгүй бол даваа гаргаас тэмцлийн өөр хэлбэрт шилжинэ гэдгээ илэрхийлмээр байна. 

-Бидний дотроос өлсгөлөн зарлах есөн ахмад байна. Бид өөрсдийнхөө амьдралын төлөө ингэж л тэмцэж байна. Биднийг дэмжиж байгаа УИХ-ын гишүүддээ баярлалаа. Тэтгэврээ 100 хувь авмаар байна.

-50/50 хувийн журам тэтгэврийн зээлтэй нэг ч ахмадад хэрэгжихгүй байна. 500 гаруй мянган ахмадтай. Үүний 50 гаруй хувь нь тэтгэврийн зээлтэй. Бид 72 цагийн хугацаатай шаардлагыг холбогдох албаныханд өгсөн. Энэ хугацаа өнөөдөр дууслаа. Бид тайван суултаа өнөөдрөөр дуусгаж байгаа. Бидний шаардлагыг хүлээж авах хүртэл тэмцэнэ гэв. 

---