Засгийн газрын өнөөдрийн хуралдаанаас гаргасан зарим шийдвэрийн талаар Тэргүүн шадар сайд бөгөөд Эдийн засаг, хөгжлийн сайд Н.Учрал дараах мэдээлэлийг өгөв. 

Тэргүүн шадар сайд, ЭЗХ-ийн сайд Н.Учрал:

-Манай улсын эдийн засгийн бүтэц хос хамааралтай. Экспортын болон төсвийн орлогын аль аль нь уул уурхайгаас хамааралтай. БНХАУ-д нүүрсний эрэлт багасвал дагаад багасдаг. Дэлхийн геополитикийн нөхцөл байдал манайд нөлөө үзүүлж байна. Үндсэн орлого болох нүүрсний үнэ 39 хувиар буурсан. Өнөөдрийн байдлаар нүүрсний үнэ 71 ам.доллартой байна. Гэтэл нүүрсний үнийг 80 ам.доллароор төсөөлж байсан нь өөдрөг төсөөлөл. Орлого 39 хувиар буурсан. Нүүрсний үнэ буурахад татвар мөн төдий хэмжээгээр багасаж байгаа. АМНАТ-ийн төлөлтөөс гадна хэмжээ багасаж байгаа.

Цаашдаа нүүрсний үнэ дэлхийн зах зээл дээр 13-30 хувиар буурна гэсэн тооцоолол гарсан. Тийм ч учраас 2026 оны төсвийн хүрээний мэдэгдлийг эргэж харах шаардлага үүсээд байна. Төсвийн орлогоо бид 33.5 их наяд гэж тооцсон боловч 3.3 их наядаар багасгах шаардлагатай. Мөн төсвийн зарлагаа танаж, тодотгох шаардлага үүсээд байна.

Цалин, тэтгэвэр, хүүхдийн мөнгөнд халдахгүйгээр төр өөрөө бүсээ чангалж, давхардал хийдэл арилгах арга зам ашиглана. Нэг хүн хийх бололцоотой ажлыг гурван хүн хийдэг байсныг хумина. Дарга нарынхаа тоог бууруулна.

Мөн гаднаас хөрөнгө оруулалт татах, урьсан шигээ хамгаалдаг байх зарчим руу шилжинэ. Улстөрийн эрх, эрх чөлөө бол эдийн засгийн эрх, эрх чөлөөгөөр баталгааждаг. Тийм учраас Засгийн газрын дөрвөн жилийн үйл ажиллагааны хөтөлбөрт суусан 14 мега төслийг эрэмбэлэх ажлыг 14 аргачлалаар үнэлсэн. Дөрвөөс таван төсөл үргэлжилнэ. Таван төсөлд хөрөнгө оруулалт татах, төр хувийн хэвшлийн түншлэлээр хэрэгжүүлэх чиглэлээр урьдчилсан үнэлгээнүүд хийгээд нээлттэй сонгон шалгаруулалт зарлах арга хэмжээ авна. Бусад таван төслийг зайлшгүй хойшлуулах шаардлага үүсэж байна. Нийслэлд хэрэгжиж байгаа төслүүдийг 14 аргачлалаар үнэлээд заримыг нь хойшлуулах шаардлага үүсэж байна.

Эцэст нь дүгнээд хэлэхэд, Төсвийн хүрээний энэ удаагийн мэдэгдэлд 2 их наяд орчим төгрөгийн хэмнэлт хийнэ, үндэсний хороо комиссыг татан буулгаж, хурал зөвлөгөөнийг улсын төсвийн санхүүжилтээр хийдгийг зогсооно. Гадаад дотоод томилолтыг хумина гэдгийг ойлгох ёстой. Наадмын өмнө зохион байгуулагддаг Эдийн засгийн форумыг өнөөдөр Засгийн газрын хуралдаан дээр ярилцсан. Гадаадын хөрөнгө оруулагч өндөр оролцоотой оролцоно. Гэхдээ энэ жилийн хувьд төрийн бус байгууллагатай хамтраад хувийн хэвшлийн санхүүжилт дэмжлэгтэйгээр зохион байгуулагдаж, төр зөвхөн оролцоно. Цаашдаа олон нийтийг хамарсан уулзалт хийхгүй, төсвөөс санхүүжүүлэхгүй байх бодлого барьж ажиллана гэв. 

 

---