Чуулганы хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж байна.

УИХ-ын гишүүд асуулт асууж дууссан. Байнгын хорооны саналаар зарчмын зөрүүтэй 30 саналд санал хурааж байна. Санал хураах явцад гишүүд зарим санал дээр эсрэг байр суурь илэрхийлэв.

УИХ-ын гишүүн О.Номинчимэг, УИХ-ын гишүүн П.Сайнзориг нар зарчимын зөрүүтэй санал дээр санал зөрөлдлөө. 

УИХ-ын гишүүн, УИХ-ын дэд дарга Б.Пүрэвдорж:

-МАН-ын гишүүд хоорондоо маргалдаж байна. П.Сайнзориг гишүүн юмны учир мэдэхгүй байна. Хөдөөгөөс хотод ирж байгаа автомашины татварыг үүгээр байхгүй болгох гэж байна гэж үзээд байх шиг байна. Тэгээд л олон юм яриад яваад байна. О.Номинчимэг гишүүн чинь бас олон жил хуулиар явсан. Зарим юм дээрээ гайгүй шүү. Эмэгтэйчүүд рүү битгий дайр.

УИХ-ын гишүүн П.Сайнзориг: 

-Дэд дарга Б.Пүрэвдорж таныг хариуцлагатай байхыг шаардаж байна. Иргэдийн төлөөлөгч зөвхөн татвар тогтоодоггүй. 330 сумын эрх байхгүй болох талаар би хэлсэн. Та бол парламентад алиалагч хийдэг хүн. Намын дарга болохын тулд битгий ийм хоёрын хооронд юм хий. О.Номинчимэг та хоёрыг ямар харилцаагаар гайгүй гэдгийг мэдэхгүй байна. Та хуулийг буруу хэлж тайлбарлаж байна. Битгий андуураад байгаарай.

УИХ-ын дарга Д.Амарбаясгалан:

-Шинээр бүрдсэн 126 гишүүнтэй парламентын нэг онцлог энэ байгаа юм. Гишүүд өөрсдийн мэргэшсэн асуудал дээр ихээхэн идэвхтэй оролцдог. Тухайлбал, нийт гишүүдийн 25 хувь нь хуульч гишүүд байна. Хуульч гишүүд маань хуулийн төслөө зөвхөн өөрсдийн өнцгөөс бус улс орны эрх ашгийн үүднээс харж, саналаа нэгтгэмээр байна. Хэлэлцэж буй явцад байр сууриа нэгтгэхгүй болохоор чуулганы хуралдааны үеэр ийм асуудал үүсэж байна. Хоёр хуульч гурван саналтай гэдэг зүйл яваад байна гэв. 

---