Он солигдохын өмнөхөн хуралдсан МҮХАҮТ-ын ээлжит бус XXI их хурлаас Л.Төр-Од ерөнхийлөгчөөр сонгогдоод даруй долоон сарын нүүрийг үзэж байна. Энэ хугацаанд бизнесийн төлөөний гол байгууллагын зүгээс хувийн хэвшлийнхээ дуу хоолой болж бодлогын өмгөөллийн нэг ч ажил хийгээгүй гэхэд хилсдэхгүй.

Монгол Улсын төсвийн цөөнгүй хувийг бүрдүүлдэг уул уурхайн компани, ААН-үүдэд Засгийн газрын БЭТ “сүр”-ийг үзүүлж байхад, гадаадын хөрөнгө оруулагч руу “эх оронч”-ийн дүр эсгэсэн эмэгтэй халдаж байхад МҮХАҮТ нүдэн балай, чихэн дүлий гүлдийгээд өнгөрсөн. Чухам энэ үед л танхим өмгөөллийн дуу хоолойгоо цуурайтуулж бизнес эрхлэгчдээ, гадаадын хөрөнгө оруулагчдаа хамгаалах ажлыг оройлон хийх ёстой байсан ч “загас шиг дуугүй” байхыг илүүд үзэж гишүүдийнхээ эгдүүцлийг төрүүлээд эхэлсэн.

Түүнээс өмнөх танхимын үе, үеийн удирдлагууд хувийн хэвшлээ хамгаалах, гадаадын хөрөнгө оруулалтыг дэмжих, татвар, бизнесийн орчныг сайжруулах асуудлаар байр сууриа хэнээс ч айж эмээхгүйгээр илэрхийлдэг байсан. Харамсалтай нь тэр цаг үе түүх болсон бололтой.

Л.Төр-Од МАН-ын бага хурлын гишүүн бөгөөд экс Ерөнхий сайд Л.Оюун-Эрдэнийн зөвлөх байсан, бизнесд гэхээсээ илүүтэй төрд ойр ажиллаж байсан түүхтэй. Тэр ч утгаараа танхим нь төрийн бодлогыг хэрэгжүүлэгч болсон гэлтэй.

Өнөөдрийг хүртэл Ерөнхийлөгчөөр ажиллаж байгаа танхимынхаа үндсэн чиг үүргийг бүрэн ойлгоогүйгээс гадна Удирдах зөвлөлөөр батлагдсан гүйцэтгэх удирдлагуудтайгаа ч хамтарч ажиллаж чадахгүй халж сольсоор хагас жилийг элээж буйг бизнесийнхэн харж гайхсаар танхимд итгэх итгэл нь алдарсаар байна.

Цаашид 65 жилийн түүхтэй энэ том байгууллага бизнес эрхлэгчдийнхээ төлөө ажиллаж чадах эсэх нь дараагийн Гүйцэтгэх захиралд нэр дэвшигч хэн байх, Удирдах зөвлөл хүлээн зөвшөөрөх, Л.Төр-Одод итгэл хүлээлгэх эсэх зэрэг олон асуудлаас шалтгаалах болоод байх шиг.

МҮХАҮТ-ын олон мянган гишүүд, түүний дотор Удирдах зөвлөлийн гишүүд, Хяналтын зөвлөл яаралтай тодорхой арга хэмжээ авахгүй бол “ТӨР” имижтэй Төр-Од танхимыг самраад дуусах нь ээ. 

---