Эрүүл мэндийн салбарт сүүлийн арван сарын турш хийгдсэн “Онцлох” бодлогын ажлуудыг танилцуулж байна.

“Үндэсний баг байгуулж, хавдар, зүрх судас, гэмтэл, мэс заслын тусламжийг орон нутгаасаа авах боломжийг бий болгож эрх зүйн орчныг бүрдүүлсэн”

2024 оны байдлаар орон нутгийн иргэд 300 тэрбум төгрөгийн эрүүл мэндийн тусламж, үйлчилгээг тухайн орон нутгаасаа авах боломжтой хэдий ч Улаанбаатар хотод ирж авчээ.

Үр дагаварт нь төрөлжсөн мэргэшлийн эмнэлгүүдийн ачаалал нэмэгдэж, иргэдэд чирэгдэл үүсэж, санхүүгийн хүндрэлд орж байна. Эрүүл мэндийн яамнаас уг асуудлыг шинэчлэх зорилгоор төвлөрлийг сааруулах цогц бодлого хэрэгжүүлж эхэлсэн. Үүнд төрөлжсөн мэргэшлийн эмнэлгүүдийн эмч, мэргэжилтнүүдээс бүрдсэн үндэсний баг “’орон нутгаас Улаанбаатар хотыг зорьж буй шалтгаанд суурилсан байдлаар” орон нутагт очиж тусламж, үйлчилгээг үзүүлэх, орон нутгийн хүний нөөцийг сайжруулах, чадавхжуулах ажлыг хийж хэрэгжүүлжээ. Уг бодлогын ажилд ЭМД-аас тарифын дэмжлэг үзүүлж эхэлсэн.

Өнгөрсөн есөн сарын хугацаанд орон нутагт нийтдээ хоёр тэрбум төгрөгийн өртөг бүхий 6600 орчим тусламж, үйлчилгээг үндэсний баг очиж үзүүлжээ. Ингэснээр иргэд чирэгдэлгүй нарийн мэргэжлийн тусламж, үйлчилгээг авч чадсан.

Дээрх “Эрүүл мэндийн тусламж, үйлчилгээний төвлөрлийг сааруулах цогц бодлого-”ыг хэрэгжүүлснээр 5.3 тэрбум төгрөгийн санхүүгийн хэмнэлтийг хийжээ. Цаашид аймаг, дүүргийн эмнэлгүүд хавдар, зүрх судас, гэмтэл, мэс заслын тусламж, үйлчилгээг өөрсдөө хийдэг болсноор эдийн засгийн үр өгөөж нь илүү нэмэгдэх юм. Тус бодлого 2028 он хүртэл хэрэгжсэний үр дүнд Улаанбаатар хотыг зорих шаардлагагүйгээр орон нутгаасаа чанартай тусламж, үйлчилгээг авах боломж бүрдэх юм.

“Иргэд эх орондоо эрүүл мэндийн тусламж, үйлчилгээгээ санхүүгийн хүндрэлд орохгүйгээр авах боломжийг нэмэгдүүлж байна.”

Гадагшаа явах эмчилгээний урсгалыг бууруулах зорилгоор арван багийг гадаадад бэлтгэж, найман баг нь эргэн ирж тусламж, үйлчилгээг нутагшуулах ажлыг эхлүүлж, эхний үр дүнг гаргажээ. Үр дүнд иргэд гадаад улс руу явж эмчлүүлэх шаардлагагүйгээр эх орондоо эрүүл мэндийн тусламж, үйлчилгээгээ санхүүгийн хүндрэлд орохгүйгээр авах боломжийг нэмэгдүүлж байна.

2020 онд Монгол Банкнаас хийсэн судалгаагаар иргэд 225 орчим тэрбум төгрөгөөр гадагшаа явж эмчлүүлжээ. Энэ зөвхөн бүртгэгдсэн мөнгөн дүн бөгөөд бүртгэгдээгүй маш их мөнгө гадагшаа урсаж байна. Уг валютыг татаж эрүүл мэндийн салбарт хөрөнгө оруулалт болгож ашиглах зорилгоор үндэсний багууд гадаадад сурч байгаа аж. Үүний үр дүнд 2028 он гэхэд гадаад улсаас авдаг бүх эрүүл мэндийн тусламж, үйлчилгээг дотооддоо эмчилдэг болох зорилт тавьжээ.

"Хорт хавдрын тусламж, үйлчилгээний хүлээгдлийг бууруулах цогц бодлогыг хэрэгжүүлж, аймаг дүүргийн эмнэлэгт шилжүүлэн төвлөрлийг сааруулах ажлыг эхлүүлсэн"

Манай Улсын эрүүл мэндийн салбарын хамгийн их төвлөрсөн тусламж, үйлчилгээ бол хорт хавдар. Уг тусламж, үйлчилгээний төвлөрлийг сааруулж, амбулаторийн тусламж, үйлчилгээ, хими, хөнгөвчлөх эмчилгээг аймаг, дүүргийн нэгдсэн эмнэлгээс авдаг болгох бодлогын өөрчлөлтийг эхлүүлээд байгаа билээ.

Хорт хавдрын туяа эмчилгээний зохион байгуулалтыг сайжруулсны үр дүнд хүлээгдлийг бүрэн арилгажээ. 2025 онд Хавдар судлалын үндэсний төвийн ачааллыг 50 хувиар бууруулах төлөвлөлт хийж, аймаг дүүргийн нэгдсэн эмнэлгүүдэд нэг хувийг шилжүүлэх юм.

Мөн Орхон аймаг дахь Медипас эмнэлгийг Хавдар судлалын үндэсний төвийн харьяанд шилжүүлэн авсан бөгөөд тус эмнэлэг нь хойд бүсийн аймгуудын хавдрын тусламж, үйлчилгээг хариуцаж, ачааллын найман хувийг хуваалцахаар төлөвлөсөн. Түүнчлэн төрөлжсөн мэргэшлийн бусад эмнэлгүүд нь мэс заслын болон бусад тусламж, үйлчилгээний ачааллыг хуваалцаж эхлээд байна.

"Эх хүүхдийн тусламж, үйлчилгээний чанар, хүртээмжийг нэмэгдүүлж, хүний нөөц, тарифыг 30-60 хувиар нэмэгдүүлсэн"

Эх хүүхдийн тусламж, үйлчилгээнд онцгой анхаарал хандуулж тухайн тусламж, үйлчилгээний тарифыг нэмэгдүүлжээ. Үүний үр дүнд эх хүүхдийн тусламж, үйлчилгээний санхүүжилт нэмэгдэж, илүү чанартай, үр дүнтэй тусламж үзүүлэх боломжийг бий болгожээ.

---