УИХ-ын гишүүн Д.Пүрэвдаваа Ерөнхий сайдад нэр дэвшигч Г.Занданшатараас татварын мөнгийг зориулалтын бусаар ашигласан яам, агентлаг, төрийн өмчийн газрын дарга нарт ямар хариуцлага хариуцлага тооцох талаар тодрууллаа. 

УИХ-ын гишүүн Д.Пүрэвдаваа:

-Түлшний үйлдвэрийг тендер зарлаж БНХАУ-д өгсөн. Үүнийг ҮАБЗ дээр яригдсан гэж ойлгосон. Ийм асуудлыг ингэж шийдвэрлэх нь хэр зохимжтой гэж үзэж байна вэ? Ерөнхий сайд болсны дараа хэдэн худалдан авалтыг төрийн нууцад оруулах вэ? Миний хувьд 20 гаруй яам, агентлаг, төрийн өмчийн газрын аудитыг харж үзлээ. Төсвийн ерөнхийлөн захирагч нь төсөв нь хязгаарлалттай гарсан. Татварын мөнгийг зориулалтын бусаар ашигласан гэдэг дүгнэлт гарсан байна. Эдгээр асуудалд ямар хариуцлага тооцох вэ?

Ерөнхий сайдад нэр дэвшигч Г.Занданшатар:

-Миний хувьд тийм худалдан авах ажиллагаанд оролцож байсан удаагүй. Төрийн худалдан авалт ил тод байх нь авлигыг бууруулж, төсвийн үр ашгийг нэмэгдүүлэх түлхүүр. Бүх худалдан авалтыг цахимаар системээр нээлттэй зарлаж, гэрээний биелэлт гүйцэтгэлийг олон нийтэд мэдээлэлд байх хэрэгтэй. Ил тод байдал л төрд итгэх итгэлийг сэргээнэ.

Төрийн худалдан авалтыг үндэслэлгүйгээр нууцаар зохион байгуулах нь авлига, үр ашиггүй зарлагын гол эх үүсвэр болдог. ҮАБЗ нь бодлогын зөвлөмж гаргадаг болохоос ямар нэг худалдан авах ажиллагааг зохион байгуулах чиглэл өгдөг байгууллага биш. Онцгой тохиолдолд төрийн онц чухал объект гэх ч юм уу ийм худалдан авалт гэж байдаг. Үүнийг ялгаж салгаж ойлгох хэрэгтэй.

Аудит бол УИХ-ын харьяа байгууллага. Эрүүгийн зөрчил гэж үзвэл АТГ, хуулийн байгууллага шалгана. Харин захиргааны журмаар шийдвэрлэнэ гэвэл Засгийн газар шийднэ. Аудитын асуудлаар мэдээлэл аваагүй байна гэв.

---