"Улсын наадмын дээд даваан дээр гарахын тулд бөхчүүд арван жил тууштай хөдөлмөрлөдөг. Нэг хүний хэдэн арван жилийн хөдөлмөр шүү дээ. Гэтэл үүнийг нь нэг гялгар уут дэвсээд үгүй хийж байгаа нь хайран санагдаж байна" гэж Улсын аварга Ч.Санжаадамба хэллээ. 

Улсын аварга Ч.Санжаадамба:

-Ж.Мөнхбат аваргын маань хөшөөний нээлт үнэхээр сайхан боллоо.

Бөхөөс холдоод тав, зургаан жил болчихлоо. Дахиж барилдахгүй байх аа. Монгол бөхийнхөө дэг жаягийг дагасан, хөдөлмөрлөсөн, эрэмбэ дараа, ёс жудгаа дээдэлсэн залуусын маань нэг нь түрүүлэх байх гэж бодож байна.

Төв цэнгэлдэхийн зүлгийг солиход нь анхнаасаа эсэргүүцэж байсан. Тус хиймэл зүлэг нь хөл бөмбөгийн зориулалттай. Халуун наранд ам хатаад маш хэцүү байдаг. Өнгөрсөн жил өчнөөн сайхан залуус маань бэртэл гэмтэл авсан. Ер нь зүлэг ногоон дэвжээг бөх мэддэг, бөхдөө ээлтэй хүн янзлах хэрэгтэй. Улсын наадмын дээд даваан дээр гарахын тулд арван жил тууштай хөдөлмөрлөдөг. Нэг хүний хэдэн арван жилийн хөдөлмөр шүү дээ. Гэтэл үүнийг нь нэг гялгар уут дэвсээд үгүй хийж байгаа нь хайран санагдаж байна. Үндэсний бөхийн холбоо, бөхчүүд маань энэ асуудалдаа анхаарлаа хандуулаарай гэж хүсмээр байна гэв. 

---