УИХ-ын чуулганы нэгдсэн хуралдаанаар Ерөнхий сайдад итгэл хүлээлгэх тогтоолын төслийг хэлэлцэж байна. Энэ үеэр Шадар сайд, УИХ-ын гишүүн С.Амарсайхан үг хэлэв. 

Шадар сайд, УИХ-ын гишүүн С.Амарсайхан: 

-Монгол Улсын тусгаар тогтнолын тулах цэг, түших багана болсон парламентын үйл ажиллагаатай холбоотой тэр дундаа зарчим, төрийн бодлого, засаглал, бидний сонгодог парламентын үйл ажиллагаа хэрхэн үргэлжлэхтэй холбоотой асуудал яригдаж байна. Ерөнхий сайдын бүрэн эрхийнхээ хүрээнд энэ итгэл хүлээлгэх эсэх тухай асуудлыг оруулж ирсэн. Хүмүүс бодлогын бус хэлэлцэх шаардлагагүй асуудал гэж байна. Энэ бол бодлогын асуудал гэж харж байна.

Засгийн газрын тэргүүн, гүйцэтгэх засаглалын асуудлаа ил тод нээлттэйгээр ярьж, санал бодлоо сольцох гэж оруулж ирсэн бодлогын асуудал. Өнгөрсөн жилүүдэд алдаа оноо, шүүмжлэл дагуулсан үйл явдал олон байсныг үгүйсгэхгүй. Засаж сайжруулах зүйл олон бий. Гэхдээ цар тахлын үеэс эхлээд эдийн засаг, эрүүл мэндийн хямралтай үед Засгийн газар үйл ажиллагаа явуулсан. Шийдэж ирсэн олон асуудал бий, цаашид ч шийдэх асуудал байгаа. Ардчилсан нам, ХҮН нам бол хувь хүний улс төр, нэр төрөөс өмнө нийтлэг эрх ашиг, нэгдмэл улс орны хөгжлийн асуудлыг хамтдаа шийдэж, нэг ч гэсэн асуудлыг хүндрэл, бэрхшээлээс гаргая гэсэн зорилгоор Хамтарсан Засгийн газар байгуулсан. Гэхдээ Ардчилсан намын ардчиллыг эрхэмлэдэг нам гэж байгаа бол хуралдаа суугаад саналаа өгөөд, асуудлаа нээлттэй ил тод ярилцаж, зарчмаа баримтлах ёстой. Ардчилсан намын гишүүд оролцоогоо хангаад, явах хэрэгтэй гэв. 

---