УИХ-ын чуулганы нэгдсэн хуралдаан нэг цагийн хугацаанд завсарлаад дахин хуралдаж байна. Монгол Улсын Ерөнхий сайдад итгэл хүлээлгэх эсэх асуудлыг УИХ-ын чуулганы хуралдаанаар хэлэлцэж байна.  

УИХ-ын гишүүд тус тогтоолын төсөлтэй холбогдуулан үг хэлж байна. Үүний дараа санал хураалт явагдах юм. 

УИХ-ын гишүүн, ХЗДХ-ийн сайд О.Алтангэрэл:

-Одоогоос 11 сарын өмнө бид тангараг өргөж, анхны чуулганы үеэр Ерөнхий сайдад хандаж асуулга тавьж байсан. Хөрөнгө орлогоо нотолж чадахгүй байгаа хүмүүсийг яах юм, хууль бус хөрөнгийн асуудлыг хэрэгжүүлэх эсэхийг асууж байсан.

Ингээд 7-р сарын 10-ны өдөр хамтарсан Засгийн газар байгуулагдаж, сонгуулийн үеэр амласан амлалтаа ажил хэрэг болгох боломж олдсон. Манай намын гишүүд эсэргүүцэж байсан. Ерөнхий сайд улс төрийн манлайлал үзүүлж, энэ хуулийн төслийг дэмжинэ гэдгээ илэрхийлсэн. Дараа нь энэ оны хоёрдугаар сард Ухаа худгийн асуудал хөндөгдсөн. Ерөнхий сайдын захирамжаар гаргасан ажлын хэсгийг би ахалсан. Дүгнэлтээ гаргасан. Ажлын хэсэг байгуулагдсан. Цаашдаа орлогоо нотол гэж шаардаж буй иргэд хууль эрхзүйн орчныг сайжруулахгүйгээр энэ асуудлыг шийдэх ямар ч боломжгүй гэдгийг ойлгоосой. 

Өнөөдрийг хүртэл Эрүүгийн хуулийн 22.10 гэдэг зүйлчлэлээр арав гаруй хүн шийтгэгдсэн. Цаашдаа урт хугацаанд үргэлжлэх ёстой үзэл санаа юм. Ямар нэг компани Монголын төрөөс том байх ёсгүй гэдгийг ойлгоосой. Хожим юунд тэмцэл болсон, хаанаас асуудал учигтай юм гэдгийг тэмдэглэж үлдэхийг хүсэж байна гэв. 

---