“Монгол Улсын Ерөнхий сайдад итгэл хүлээлгэх тухай” Улсын Их Хурлын тогтоолын төслийг чуулганы нэгдсэн хуралдаанаар хэлэлцэж байна. Хуралдаанд 126 гишүүн ирэхээс 102 нь ирж, ирц 81 хувьтай байна. Хэлэлцэж буй асуудалтай холбогдуулан УИХ-ын гишүүд асуулт асууж, байр сууриа илэрхийлж байна.

УИХ-ын гишүүн, Батлан хамгаалахын сайд С.Бямбацогт:

-2024 оны сонгуулиар байгуулагдсан хамтарсан засгийн газар жил хүрэхгүй хугацааны дотор олон жил гацсан томоохон төслүүдээ хөдөлгөсөн. Мөрийн хөтөлбөрөө хэрэгжүүлэхийн төлөө гар сэтгэл нийлж ажилласан АН-ын гишүүддээ талархаж байна.

Эдийн засаг муу, дэлхий даяар хямралд өртөж, дэг журам өөрчлөгдөж байна. Хүчтэй нь хүчгүйгээ дээрэлхэж, бодлогоо тулгадаг ээдрээтэй цаг үед бид уг нь аль болох эв нэгдлээ барьж, зөвшилцөж ойлголцож явмаар байгаа юм.

Өнөөдөр олон хүн үг хэлэх байх. Хагацашгүй сайн нөхөртөө марташгүй муу үг бүү хэлээсэй. Идэж байгаа тогоо руугаа бүү нулимаасай гэж хүсэж байна.

Олон засгийн газар огцорсон хүнд үеийг бид туулжээ. 2012-2016 онд олонхи цөөнх болж маргалдаж, олон жилийн ужгирсан тэмцэл болж байсан. 2016-2020 оны улс төржилтөөр манай нам 65 суудалтай байж 32/33 хуваагдаж, хэдэн жилийг үдэж, арай гэж энэ шарх илааршиж байна.

Үл ойлголцол үзэн ядалт болдог. Энэ нь улс орны тусгаар тогтнолд эрсдэл учруулдаг. Эцсийн эцэст, асуудал санал хураалтаар шийдэгдэнэ шүү. Уулзах нүүртэй, улс орны эрх ашгаа эхэнд тавьсан шийдвэр гаргаасай гэж хүсэж байна гэв. 

---