УИХ-ын гишүүн, Үндэсний эвслийн тэргүүн Н.Номтойбаяр Төрийн ордонд мэдээлэл хийж байна. "Гарын үсэг цуглуулж, санаачилга гаргаад явж байгаа УИХ-ын гишүүдийг АТГ-аар шалгуулна, туг тахина" гэдэг яриа Төрийн ордонд ид өрнөж байна" гэв. 

УИХ-ын гишүүн, Үндэсний эвслийн тэргүүн Н.Номтойбаяр: 

-Үндсэн хуульд өөрчлөлт оруулна, Ерөнхийлөгчийн засаглалтай болон санаархал Л.Оюун-Эрдэнийн Засгийн газрыг огцруулахтай зэрэгцэн орж ирсэн нь үнэн. Ардчилсан намын 42 гишүүн Ерөнхийлөгчийн засаглалын эсрэг гарын үсэг цуглуулаад явж байгаа нь дээрх баримт үнэнийг нотолж байна. Ийн санаачлаад явж байгаа гишүүдийг "АТГ, Тагнуулаар шалгуулна", "туг тахина" гэдэг яриа Төрийн ордонд ид өрнөж байна. Надтай холбоотой хүмүүсийг, шулуухан хэлэхэд УИХ-д ажиллаж байгаа ажлын албаны хүнийг Тагнуулаас дуудаж учир битүүлэг байцаалт авсан. 

МАН-ын 65-ын бүлэг, 32,33-аар хуваагдаж, АН-ын есийн бүлэг 3,6-аар хуваагдаж, Х.Баттулга Ерөнхийлөгчийн засаглал руу өөрчлөхийн тулд замд нь саад тээг болсон хүмүүсийг хилс хэрэгт гүтгэн хэлмэгдүүлж байсан. Би нэг хохирогчийнх нь хувьд өглөө бүр үүнийг санаж явдаг. Х.Баттулга тэр санаархлаа орхиогүй гэдэгт итгэдэг. Төрийн хутгуур гэж хардаг. Тухайн үед Ерөнхий сайд байсан У.Хүрэлсүх, Х.Баттулгын санаархлыг тас цохиж байсан талархалтай ханддаг. 

Энэ бүхнийг одоо хуралдах ТББХ-н дээр Ерөнхий сайдаас асууж байж дэмжих, дэмжихгүйгээ шийднэ. 

УИХ-ын гишүүд маш их айдаст автсан байна. Эргэлзээнд орсон байна. Монголын төр айдас, эргэлзээнд автсан байгаа бол монгол төрийн бодлогод маш их хор хохирол авчирна. УИХ-ын гишүүдийг зоригтой байгаасай, хэнээс ч үл хамааран шийдвэрээ гаргаасай гэж хүсэж байна. 

Учир нь, нэр бүхий 11 гишүүнийг мөрдөж мөшгин ойрд дотны хүмүүсээс нь байцаалт авч заналхийлсэн. Би өөрийн юмаа хэлж байна. Бүгд мэдэж байгаа. Бүгд үгээ хэлээсэй гэж хүсэж байна. Хэн араас яваад байгаа юм, хэн шоронд хийнэ гээд байгаа юм гэдгийг яриасай. Би сөрнө. Тиймээс саяны мэдэгдлийг хийлээ. 

Монгол ардын намын Бага хурал дээр Ерөнхий сайд "Ажлаа өгнө" гэж тов тодорхой хэлсэн байна лээ. Л.Оюун-Эрдэнэ ажлаа өгнө. Дараагийн Ерөнхий сайд томилогдох нь цаг хугацааны асуудал. "Орлогоо нотол" гэдэг нь хууль хяналтын байгууллага шийдээд гарах асуудал. Тэр байтугай УИХ-ын гишүүний асуудал хөндөгдөнө.

Дараагийн Ерөнхий сайдын бодлого нь юу юм, татвар бууруулах юм уу гэдгийг харж байж нэгдэх эсэхээ шийднэ. 

Сая амралтын өдрүүдээр "Н.Номтойбаяр Шадар сайд болох гэнэ" гэсэн яриа гарсан байна лээ. Битгий болоогүй яриаг болсон мэтээр гүтгэж доромжлоод байгаарай! "Татвар бууруулахгүй" гэвэл би засагт орохгүй. Ардчилсан намтай нийлээд сөрөг хүчний байр суурин дээрээ гарна гэв. 

---