"Эрүүл мэндийн салбарын төсвийг ДНБ-ий зургаан хувьд хүргэвэл тусламж үйлчилгээнд асуудал үүсэхгүй" гэж УИХ-ын гишүүн, Эрүүл мэндийн сайд Т.Мөнхсайхан хэллээ. 

УИХ-ын гишүүн, Эрүүл мэндийн сайд Т.Мөнхсайхан:

-Диализын тусламж үйлчилгээ өмнө нь нэлээдгүй чирэгдэлтэй байсан. Одоо ихэнх төвүүд 24 цагийн үйлчилгээ үзүүлж байгаа. Ингээд хүндрэл чирэгдэл багассан. Зарим нэг эмнэлгүүд худалдан авалтаа хийчихээд түүнийхээ төлбөр мөнгийг өгөхгүйгээс зарим талаар чирэгдэл учирсан гэх мэдээлэл байна. Улсын хэмжээнд хэрэгсэл тасарсан зүйлгүй.

Хавдрын туяа эмчилгээ 40 хоногийн оочиртой байсан бол өнөөдөр ямар ч оочиргүй байна. 18 аймагт хавдрын тусламж үйлчилгээг үзүүлж байна. Гурван аймгийг ирэх сард тус үйлчилгээг үзүүлдэг болно. Гурван дүүрэгт Хавдрын төв байгуулж байгаа зэрэг ажил хийж байна. Оношоо тодруулахаар ирж байгаа хүн 14 хоногийн дотор оношоо тодруулна. 

13А маягтыг цахим болгоно. Энэ нь иргэдэд дэм болох ёстой маягт. Зургаан сарын нэгнээс хавдрын тусламж үйлчилгээ дээр хэрэгжиж эхэлнэ. Арванхоёрдугаар сарын нэгэн гэхэд улсын хэмжээнд хэрэгжинэ. 

Эрүүл мэндийн салбарын төсвийг ДНБ-ий зургаан хувьд хүргэвэл тусламж үйлчилгээнд асуудал үүсэхгүй гэв. 

---