Маргааш буюу тавдугаар сарын 21-ний өдөр МАН-ын бага хурлаар хамтарсан Засгийн газар цаашид байх эсэх асуудлыг хэлэлцэнэ. Энэ талаар зарим гишүүдийн байр суурийг хүргэж байна. 

УИХ-ын гишүүн О.Номинчимэг:

-Намын эрх ашгаас илүүтэй улс эх орны эрх ашиг нэгд байх ёстой гэсэн зарчмыг баримталж байгаа.

Өнгөрсөн 30 жилийн түүхийг харахад дотооддоо тэмцэлдээд үр дүн гаргахгүй ажилласаар гурав дөрвөн жил нь өнгөрдөг түүх байна. Тэгэхээр энэ удаад хамтраад улс эх орныхоо ашгийг нэгд тавиад, намынхаа эрх ашгийг хоёрт тавиад хувийнхаа эрх ашгийг хойш нь тавья гэдэг уриа доор намууд маань нэгдээд хамтарсан Засгийн газар байгуулсан. Энэ цагт хамтраад том асуудлуудаа шийдээд явах хэрэгтэй.

Би энэ бүх асуудлуудын ард улс төржилт байна гэж харж байгаа. Ард иргэдийн нийгэмд байгаа тэгш бус байдал, амьжиргааны асуудлын бухимдал дээр дөрөөлөөд улс төржилт явж байгаа. Дараа дараагийн шийдэгдэх татвар болон нийгмийн даатгалын тогтолцооны реформ хийгдээсэй л гэж хүсэж байна. Баялагийн сангийн асуудал, том төсөл хөтөлбөрүүдээ явуулах гэхээр нөгөө талд эрх ашиг нь хөндөгдөж байгаа хүмүүсийн бухимдал байх шиг байна. Түүн дээр л улс төржилт яваад байна уу гэдгийг харах ёстой гэлээ. 

---