"Хөгжлийн бэрхшээлтэй хүний эрхийн хэрэгжилтэд нутгийн удирдлагын оролцоо" үндэсний зөвлөгөөн өнөөдөр Төрийн ордонд боллоо. Энэхүү зөвлөгөөний ач холбогдлын талаар УИХ-ын гишүүн Ж.Баясгалангаас тодрууллаа. 

УИХ-ын гишүүн Ж.Баясгалан: 

-УИХ-ын гишүүн болсноос хойш 18 аймгаар явлаа. Тэр бүрд Засаг дарга, ИТХ-ын даргатай уулзаж чаддаггүй. Өнөөдөр бүгдээрээ хуран чуулаад буйгаараа их ач холбогдолтой. 

Монгол Улсад хөгжлийн бэрхшээлтэй 111 мянган иргэн байна. Энэ бол 111 мянган өрхийн асуудал байхгүй юу. Бид хөгжлийн бэрхшээлтэй иргэний тухай л яриад байдаг. Цаана нь байгаа асран хамгаалагчдын талаар ярьдаггүй. Бид нар ажлын найман цаг ажиллачихаад "ядарлаа" гэдэг бол асран хамгаалагч нар 24 цаг ажиллачихаад гомдол гаргадаггүй. Чимээгүй, цалин авдаггүй, үргэлжийн ажиллаж байдаг хүмүүс бол асран хамгаалагчид байхгүй юу. Иймээс энэ хүмүүсийн эрх зүйн орчныг сайжруулах шаардлагатай байгаа юм. Үүнд л өнөөдрийн арга хэмжээний ач холбогдол оршиж байгаа юм... 

---