Монгол улсын Засгийн газраас ирэх оны төсвийн төсөөллийг УИХ-д өргөн мэдүүлж, хэлэлцэж эхэлсэн. Уг төсөөлөлтэй холбогдуулан гишүүдийн байр суурийг хүргэж байна. 

УИХ-ын гишүүн Б.Мөнхсоёл:

-2026 оны хөгжлийн төлөвлөгөөг авч хэлэлцсэн. Төлөвлөгөө, төсөв хоёр шууд уялдаа холбоотой. Төсөл хэрэгжүүлнэ гэдэг ч бодит байдал дээр санхүүгийн эх үүсвэр байхгүй бол хэрэгжих боломжгүй. Тэрэн шиг 2026 оны төсвийн хүрээний мэдэгдэл болон 2027-2028 оны төсвийн төсөөллийг хэлэлцэж байна. Орлого, зарлага, алдагдлаас гадна төсөөлөл дээр макро эдийн засгийн тооцоолол дээр эргэлзээтэй асуудал байна. Эдийн засгийн хөгжлийн яамны тооцож байгаа тооноос Төсвийн тогтвортой байдлын зөвлөлийн тооцож байгаа төсөөлөл өөр байна. 

Гадаад хүчин зүйлээс гадна дотоодын бодлогоос хамаарч өөрчлөгддөг. Эхний гурван сарын байдлаар улсын төсөв 1,2 их наядаар дутаж, цаашид ч алдагдал үргэлжлэхээр байна. Үүнийг ямар байдлаар нөхөх вэ гэхээр бусад эрдэс баялагт анхаарна гэж байна. Алт, нүүрс хоёрын оруулж байгаа мөнгөний тоо төсөөлшгүй өөр байгаа. 2024 оны байдлаар уул уурхайгаас 10,1 их наяд олж байгаагаас нүүрснээс 66 хувь, алтнаас 4 хувийн л орлого олжээ. Уул уурхайгаас хамааралтай манайх шиг улс дэлхийн зах зээл дээрх эрдэс баялгийн үнэ, өөрсдийн экспортын чадамжаа харж төсвийн төсөөллөө хийх нь зөв гэв.

---