УИХ-ын гишүүн О.Батнайрамдал өнөөдөр "Оюутолгойн бүлэг орд бол Монгол Улсын төдийгүй дэлхийн хамгийн сор болсон алт, зэсийн орд. Гэтэл энэ орд дээр гадны хоёр компани манай улсын талын ямар ч оролцоогүйгээр гэрээ хийж, тэр ч байтугай энэ оноос ашиглаж эхлэх гэж байна" хэмээн мэдэгдсэн.

УИХ-ын гишүүн Ц.Идэрбат уг асуудлаар мөн байр сууриа илэрхийллээ.

УИХ-ын гишүүн Ц.Идэрбат: 

-"Онтрэ" ХХК-тай холбоотой асуудал дээр манай улсын хууль эрхзүйн байдал тодорхой болчихсон.

Оюутолгой төслийг хэлэлцэж байх үед баялгаасаа яаж ашиг хүртэх ёстой вэ, энэ том ордуудыг яаж эдийн засгийн эргэлтэд оруулах вэ, манай улсын эрх ашиг хаана нь шингэх вэ гээд олон зүйл дээр эрхзүйн хувьд том тохируулга байгаагүй. Харин өнөөдрийн "Онтрэ" ХХК-ийн асуудал яригдаж байгаа энэ цаг үе бол өөр. Бид Үндсэн хууль болон Баялгийн сангийн хууль дээрээ маш тодорхой зааж өгсөн тул хуулийн хүрээндээ ярих ёстой.

Миний хувьд, Оюутолгой дээр манай улс гаргасан алдаагаа харин ч "Онтрэ" ХХК-ийн гэрээн дээр илүү сайжруулж засаад явах нөхцөл гарч ирж байна гэж харж байна. Одоогоор би хэвлэлийн мэдээлэлтэй л байна. УИХ дээр асуудал орж ирэхэд Засгийн газрын байр суурийг илүү сонсох ёстой гэв. 

---