Засгийн газрын хуралдаанаас гаргасан шийдвэрийг танилцуулж байна.

ЗГХЭГ-ын дарга Н.Учрал:

-Үүсмэл ордууд дээр авч хэрэгжүүлэх арга хэмжээний тухай Засгийн газрын тогтоолын төслийг баталлаа. Ашигт малтмалын тухай хуулиар стратегийн орд түүний үүсмэл ордын 34 болон 50 хүртэлх хувийг төр үнэ төлбөргүйгээр эзэмшинэ гэдэг заалт байдаг. Үүсмэл орд нь стратегийн ордоо түшиглэсэн баялаг. Өнгөрсөн хугацаанд уурхайнуудыг түшиглэсэн үүсмэл ордуудыг бусдад ашиглуулахдаа ямар нэгэн нээлттэй сонгон шалгаруулалт хийхгүйгээр ашиглуулдаг байсан. Харин өнөөдрийн Засгийн газрын тогтоолоор уурхайг түшиглэсэн үүсмэл ордуудыг ашиглахдаа төр хувийн хэвшилтэй өрсөлдөхгүй гэх зарчмыг баримталж, хувийн хэвшлийн хөрөнгө оруулалтаар тухайн овоолгыг ашиглаж байгаа тохиолдолд нээлттэй сонгон шалгаруулалтад тэнцсэн компани нь гэрээ байгуулж, эзэмшлийнхээ 34 хувийг баялгийн сандаа хуримтлуулаад ашиглалтын болон бусад төлбөрөө үйлдвэртээ төлөөд явах ийм бололцоог өнөөдрийн Засгийн газрын хурлаар албажууллаа.

Эрдэнэтийн овоолгын ашиглаж гурван үүсмэл ордыг эзэмшиж байгаа компаниудтай хэлэлцээрийг албан ёсоор дуусгаж, Баялагийн санд 34 хувийг төвлөрүүлэх чиглэлийг Засгийн газрын тогтоолоороо өгсөн. Хэлэлцээр үргэлжилж байна. Хоёр долоо хоногийн дотор хэлэлцээрийн эцсийн үр дүнг танилцуулна. 

Эрдэнэт үйлдвэрийг түшиглэсэн тус үүсмэл ордуудыг ашиглаж байгаа компаниудын үйл ажиллагаатай танилцахад зэсийн агууламж өөр байдаг юм байна. Ингээд ашиг орлого нь хоорондоо зөрүүтэй. Зарим компани ашиглалтын төлбөр төлдөг байхад, зарим нь иргэдэд компанийн хувиа эзэмшүүлдэг байх жишээтэй. Эрдмин ХК Эрдэнэт үйлдвэрт 25 хувиа эзэмшүүлдэг байна. Ачит ихт ашиглалтын төлбөр төлдөг гэх зэрэг нөхцөл байдал нь өөр өөр байна. Иймд бид зайлшгүй магадлан шинжилгээ хийх шаардлагатай гэж үзсэн. Санхүүгийн шинжилгээ дээр суурилж төрийн эзэмшлийн 34 хувиа авсан тохиолдолд иргэний хуримтлалын санд хэдэн төгрөг орох вэ? гэдгийг судлах шаардлагатай. Түүнчлэн 34 хувиа бүтээгдэхүүн хуваах, ашигт малтмалын нөөц ашигласны төлбөрөөр орлуулах юм бол хуримтлалын санд  хэдэн төгрөг ирэх вэ гэдэг бас нэг хувилбар байгаа. Хэлэлцээрийг хэд хэдэн байдлаар хийж байна гэв. 

---