ЭМДЕГ-аас хөнгөлөлттэй эмийн санхүүжилтэд 9.6 тэрбум төгрөг зарцуулсан гэх асуудлаар ЭМЯ-наас мэдээлэл хийв. 

Эрүүл мэндийн даатгалын ерөнхий гарын дарга С.Энхболд:

-Жил бүр ЭМДС-гийн 7 хувийг хөнгөлөлттэй эмэнд зарцуулдаг. Энэ жил ЭМДЕГ 2.5 их наядын 135 тэрбумыг нь хөнгөлөлттэй эмэнд зарцуулахаар УИХ-аар баталсан. ЭМДЕГ-тай гэрээ хийсэн 1500 орчим эмийн сангаар дамжуулан, хөнгөлөлттэй эмийг олгодог. ЭМЯ-ны дэргэдэх Эмийн зөвлөлөөр зайлшгүй шаардлагатай эмийн жагсаалтад батлагдсан, Монгол Улсад бүртгэсэн, жороор олгодог эмийн үнийг хөнгөлдөг.

Монгол Улс аль өвчлөл тэргүүлэх шалтгаан болж байна, түүнд ямар эм хэрэглэж байгааг Эмийн жагсаалтад бүртгэж, ингээд ЭМДС-гаас хувь хэмжээг тогтоож, үнийг нь хөнгөлдөг гэсэн үг. Хөнгөлөх хувь хэмжээг ЭМДЕГ тогтоодог. Тодруулбал, уналт таталтын эсрэг эмийг 18 хүртэлх насны хүүхдэд 100 хувь үнэгүй олгодог. 590-ээд төрлийн эмийн үнийг 30, 50, 70 хувь хямдруулж олгодог. Үүнээс 138 тэрбум төгрөгт багтааж, эмийн сангаар хөнгөлөлттэй эм иргэдэд олгож байна. 

ЭМДС-гаас өнөөдрийн байдлаар хоёр удаагийн санхүүжилтээр 1.6 тэрбум төгрөг гаргасан. 2024 оны 12-р сард 1.2 тэрбум, 2025 оны 4 сарын эхээр үлдэгдэл төсөв гарсан.

Эм эмнэлгийн хэрэгслийн зохицуулалтын тухай хууль 2024 оны зургаадугаар сард батлагдсан. Үүний дагуу журмыг шинэчлэн батлах ёстой. Одоогоор уг журмыг шинэчлээгүй байна. Тиймээс ЗГ-ын 2024 оны 42-р журмаар зохицуулж байна. Энэ журмын 4 дэх заалтаар ЭМЯ тусгай сан үүсгэж, уг санд санхүүжилтийн эх үүсвэрийг төвлөрүүлж, цааш шилжүүлэхээр тусгасан. Энэ журмын дагуу ЭМДС-гаас эмийн үнийг гаргасан.  

2024 оны 11 сард эмийн агентлагаас тооцооллыг гаргаж явуул гэдэг албан бичиг манай байгууллагад ирсэн. Үүний дагуу манай байгууллага хөнгөлөлттэй, нэг үүсвэртэй эмтэй холбоотой урьдчилсан тооцооллыг гаргаж өгсөн. Ингээд тооцоолол хийхэд нийтдээ 9.6 тэрбум төгрөг гарахаар байна гэдэг урьдчилсан дүн гарч, үүнийг албан бичгээр хүргүүлсэн юм билээ. Түүнээс биш 9.6 тэрбум төгрөгийн санхүүжилт гарсан зүйл байхгүй. Нэг үүсвэрт эмийн бодлого хэрэгжсэнээс хойш өнөөдрийг хүртэл 1.6 тэрбум төгрөгийн санхүүжилт хийсэн.

ЭМЯ-ны Эм эмнэлгийн хэрэгслийн бодлогын хэлтсийн дарга Л.Намхайноров:

-Засгийн газрын тогтоол, хуульд зааснаар бид гадаад улсаас эм эмнэлгийн хэрэгсэл худалдан авахдаа нэг эх үүсвэрээс эсвэл дамжуулан худалдан авдаг.

Эрүүл мэндийн даатгалын хөнгөлөлттэй олгогддог 18 нэр төрлийн эмийг БНСУ-ын дөрвөн үйлдвэрлэгчидтэй хэлцэл хийн үнэ тохирч Монгол Улсын дотоодын зах зээлд оруулж ирж, эрүүл мэндийн даатгалаар хөнгөлөлттэй эм олгодог эмийн сангуудад дамжуулж иргэдэд хүргэж байна. Эрүүл мэндийн даатгал дээр хамгийн их ачаалал үүсгэж байгаа, хамгийн их төсөв зарцуулагдаж байгаа эм байдаг. Энэ тооцооллоор 23.5 тэрбум төгрөгийг хэмнэх боломжтой гэв. 

---