Цагдаагийн ерөнхий газрын Хар тамхитай тэмцэх газраас их хэмжээний мансууруулах бодис хурааж авсан хэргүүдийн талаар мэдээлэл хийв. Монгол Улсын дөрвөн иргэн Сэлэнгэ аймаг Алтанбулаг хилийн боомтоор ОХУ-аас их хэмжээний мансууруулах үйлчилгээтэй эмийг хууль бусаар хилээр нэвтрүүлж баривчлагдсан байна.

Мөн олны танил хүмүүс мансууруулах төрлийн үйлчилгээтэй ургамлыг эрүүл мэндэд тустай мэтээр буруу мэдээлэл түгээж байгааг буруутгав. 

ЦЕГ-ын Хар тамхитай тэмцэх газрын хэлтсийн дарга, Цагдаагийн хурандаа Б.Батхуяг:

-Олны танил хүмүүс мансууруулах төрлийн үйлчилгээтэй каннабисийн төрлийн ургамлыг "Эрүүл мэндэд сайн" гэж буруу мэдээлэл өгч байна.

Каннабисийн төрлийн ургамал нь дэлхий дээр 100 гаруй сорт байдаг. Манайд хоёр төрлийн сорт ургадаг. Уг ургамал мансууруулах химийн элемент агуулдаг. Тухайн буруу мэдээлэл өгөөд буй иргэн нь хар тамхины хэргээр ял шийтгэгдэж байсан.

Каннабисийн төрлийн ургамлыг хэрэглэсэн үедээ хүн амины гэмт хэрэг үйлдсэн асуудал 2021 онд бүртгэгдсэн. Эзэнгүй байшингаас цогцос олдсон. Гэмт хэрэгтнийг барьж биологийн дээж авч шалгахад тухайн этгээдээс каннабисийн төрлийн ургамал илэрсэн байдаг. Тухайн мансууруулах үйлчилгээтэй ургамлыг хэрэглэсэн хүн ямар ч төрлийн гэмт хэрэг үйлдэхээс буцахгүй, хүнийг өрөвдөх хайрлах сэтгэлгүй, аюултай догшин хэрцгий болдог. Энэ зүйлийг эмчилгээнд хэрэглэдэг сайн ургамал мэтээр буруу мэдээлэл тараах ёсгүй. Буруу мэдээлэлээс болж олон хүүхэд залууст хэрэглэж үзэх сэдэл төрж байгаа. Тиймээс хатуу хариуцлага тооцох ёстой гэдгийг хэлье.

Уг ургамал нь 11 аймгийн 5000 га газарт ургадаг. Энэ ургамлыг түүж бэлтгэх худалдан борлуулахтай холбоотой хэрэг гэмт хэргийн 70 хувийг эзэлж байна гэлээ. 

---