Цагдаагийн ерөнхий газрын Хар тамхитай тэмцэх газраас их хэмжээний мансууруулах бодис хурааж авсан хэргүүдийн талаар мэдээлэл хийв.

ЦЕГ-ын Хар тамхитай тэмцэх газрын хэлтсийн дарга, Цагдаагийн хурандаа Б.Батхуяг:

-Монгол Улсын дөрвөн иргэн Сэлэнгэ аймаг Алтанбулаг хилийн боомтоор ОХУ-аас их хэмжээний мансууруулах үйлчилгээтэй эмийг хууль бусаар хилээр нэвтрүүлснийг Улаанбаатар хотод баривчилсан. Уг дөрвөн этгээдээс гуравт нь цагдан хорих таслан сэргийлэх арга хэмжээ авч, нэг этгээдийг хөдөлгөөн хязгаарлах арга хэмжээ аваад байна.

Уг эм нь эмчийн энгийн жороор олгогддог. Хүүхэд залуус мансуурах зорилгоор эмнэлгийн бус нөхцөлд урвуулан хэрэглэдэг. Өвчин намдаах үйлчилгээтэй хоногт нэг ширхэг уудаг эмийг 5-10 ширхгээр тарианы устай найруулж судсаар тарьж хэрэглэдэг байна. Ингэхдээ судасны гадуур тарих болон судас бөглөрөх шалтгаанаар эрүүл мэндэд нь хохирол учирдаг.

2022 оноос эхлэн энэ төрлийн гэмт хэрэг бүртгэгдэж эхэлсэн. Өнөөдрийн байдлаар өсвөр насны 13 хүүхэд нас барсан. 40 гаруй хүүхэд гар хуруугаа тайруулсан. Ийм хор хөнөөлтэй эм бэлдмэлийг хууль бусаар борлуулахыг завдсан этгээдүүдийг баривчлаад байна.

Зүү тариур дуслын системийг жортой олгодог болсноос хойш эмийн сангаар худалдаалах тохиолдол байхгүй болсон. Гэвч хууль бусаар зарах тохиолдол зогсохгүй байна. Нэг зүү тариур, дуслын системийг 5-10 хүүхэд дамжуулж хэрэглэж байгаа нь эрсдэл үүсгэж байгаа юм.

Мансууруулах бодис хэрэглэсэн тохиолдлуудаас хамгийн багадаа 13 настай хүүхэд бүртгэгдсэн. Эцэг эх асран хамгаалагч нар хүүхдүүдийнхээ хөл гарын судсыг шалгаж, зүү тариурын ул мөр байгаа эсэхийг харах хэрэгтэй.

Өнөөдрийн байдлаар 69 хүүхэд энэ төрлийн гэмт хэргээр зөрчлийн болон эрүүгийн хэргээр ял шийтгэл хүлээсэн. Хүүхдүүд нэгнээ шахалтад оруулах тохиолдол их байна. “Чи ганцаараа хэрэглэхгүй үлдэж байж биднийг барьж өгөх гэж байна” гэх мэтээр гадуурхах зэрэг үйлдэл гаргадаг гэв. 

---