УИХ-ын чуулганы нэгдсэн хуралдаанаар Зөвшөөрлийн тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн төслийг хэлэлцэж байна. 

Засгийн газраас өргөн мэдүүлсэн энэхүү төсөлд төлбөрт, таавар, бооцоот тоглоом, цахим мөрийтэй тоглоомын үйл ажиллагаа эрхлэхийг бүхэлд нь хориглож, төлбөрт таавар, бооцоот тоглоомын үйл ажиллагааг тусгай зөвшөөрөлтэйгөөр эрхлэх үйл ажиллагаанаас хасахаар заажээ.

Сүүлийн гурван жилийн хугацаанд мөрийтэй тоглоом зохион байгуулах зүйл ангиар 669 хэрэгт мөрдөн шалгах ажиллагаа явуулж 200 хэргийг шүүхэд шилжүүлэх саналтай явуулж, 104 хэргийг шүүхээр эцэслэн шийдвэрлэжээ. Монгол Улсад давхардсан тоогоор сүүлийн гурван жилийн хугацаанд хууль бус мөрийтэй тоглоомын 350-450 орчим сайт үйл ажиллагаагаа идэвхтэй явуулж байна.

Хууль зүй, дотоод хэргийн яамнаас Зөвшөөрлийн тухай хуульд заасан төлбөрт таавар, бооцоот тоглоомын үйл ажиллагаа эрхлэх тусгай зөвшөөрлийг “Темп партнерс” ХХК, “Эн Зэт Жи Эм” ХХК, “Мон Экс Бэй Ти Билэг” ХХК-д олгож, олон улсад бооцоот тоглоомын чиглэлээр үйл ажиллагаа явуулдаг 1хBет сайт нь одоогоор тусгай зөвшөөрөлгүй үйл ажиллагаа явуулдаг аж. 

Хуулийн төсөлтэй холбогдуулан УИХ-ын гишүүд асуулт тавьж хариулт авч байна. 

УИХ-ын гишүүн Б.Бат-Эрдэнэ:

-Хаах боохоос илүү тодорхой зохицуулалт шаардлагатай байсан юм биш үү. Хааж боосноор хууль бус мөрийтэй тоглоом илүү их болж, гадаад руу гарч тоглох хэлбэр ихсэхгүй юу?

ЗГХЭГ-ын Н.Учрал:

-Гадаад руу гарчихаад байгаа 500 сая ам.доллар гэдэг бүртгэлтэй гарч байгаа урсгал нь. Бүртгэлгүйгээр буюу крипто валютаар, койноор утаснаас утасны хооронд шилжүүлж байгаа валютыг хэн ч тоолж чадаагүй. 500 сая ам.доллар бол бүртгэлтэй буюу арилжааны банкаар дамжуулсан нь. Дунд нь зуучлал хийдэг агентууд цахим хаяг ашиглуулдаг, данс ашиглуулдаг. Данс руу мөнгөө хийгээд гаргадаг. Ингээлд эхлэхээр Монголбанканд ирж байгаа нэгдсэн статистик дээр 500 сая ам.доллар гарч байгаа. 

2023 онд 417 тэрбум төгрөгийн эдийн засгийн хохирол учирсан, 1.7 их наяд төгрөг гараад явсан байхад төр юу ч хийхгүй, чөлөөтэй байх ёстой гээд хаяж болохгүй. Инфляцид ч нөлөөлж байна. Энэ байдлыг хуулиар зогсоогоод, хуулийн байгууллага, харилцаа холбооны салбар, технологийн байгууллага, Засгийн газар  бүрэн чадлаараа ажиллаж чадвал 65 хувиар бууруулж чадах юм байна гэж үзээд хуульд өөрчлөлт оруулж байгаа.

Монголбанкны дэд ерөнхийлөгч Г.Энхтайван:

-Монгол Улсын харьяат болон Монгол Улсын харьяат бусын хооронд хийгдсэн гүйлгээг тооцоход 2021 онд 120 сая ам.доллар, 2022 онд 198 сая ам.доллар, 2023 онд 430 сая ам.доллар, 2024 онд 578 сая ам.доллар буюу 1.3 тэрбум долларыг гадагш нь шилжүүлсэн. Тоглогч маань нэг удаагийн тоглолтоор хожоод мөнгөө авсан боловч дараагийн тоглолт дээр алддаг. Тайлан дээр хожиж орж ирсэн мөнгөний урсгал байдаггүй гэв. 

---