УИХ-ын Хууль зүйн байнгын хорооны дарга Д.Цогтбаатар нар Цагдаагийн албаны тухай хуульд нэмэлт өөрчлөлт оруулах хуулийн төслийг өргөн барилаа.

УИХ-ын Хууль зүйн байнгын хорооны дарга Д.Цогтбаатар: 

-Өнгөрсөн оны долдугаар сард хорих 461 дүгээр ангид залуу хүүхдийн амь эрсдсэн. Хууль зүйн байнгын хороо яагаад ийм нөхцөл бүрдсэн талаар хүний эрхийн дэд хороог хуралдуулсан. Үүний үндсэн дээр цагдаагийн албаны тухай хуульд нэмэлт өөрчлөлт оруулах ёстой гэж үзсэн.

Тухайн үед амь хохирогчийг эрүүдэн шүүсэн эсэх асуудал ярих гэхээр нотлох баримтгүй. Аль талаас асуудалтай байсан гэдгийг тогтоох боломжгүй болчихсон. Тэгэхээр цагдаагийн албаны тухай хуульд камерын тухай заалтыг заавал оруулж өгөх ёстой гэж үзсэн. Камерын асуудал журмаар хэлэлцэгдэж байсныг хууль руу маш тодорхой оруулж өгч байгаа.

Журамд байгаа заалтыг төсөв рүү оруулахаар төсөв нь хасагдахаар яах ч аргагүй. Харин хуульд орсон заалтын төсвийг хасах юм бол Сангийн яам хууль зөрчинө гэсэн үг. Ингэснээр хуулийн үр дагавар гарч ирнэ. Хүний эрхийг хамгаалах нөхцөл сайжраад зогсохгүй цагдаагийн алба хаагч нарын эрхийг ч хамгаалах нөхцөл бүрдэнэ гэв. 

---