Хандив авсан компанитай нь холбоотой асуудлыг чуулганаар хэлэлцэхэд хүрвэл тухайн гишүүн санал өгөхөд оролцдоггүй байхаар дэгийн хуульд өөрчлөлт оруулах шаардлагатай гэдгийг УИХ-ын гишүүн С.Эрдэнэболд хэлэв. 

УИХ-ын гишүүн С.Эрдэнэболд: 

-"Транспэрэнси Интернэшнл" байгууллагын зөвлөмжөөр манай улсын авлига өсөөд буй шалтгаан нь сонгуулийн үеэрх санхүүжилтийн асуудал ил тод биш байгааг дурдсан. Улс төрийн санхүүжилт ил тод биш байхаар сонгуулиар асар их бэлэн мөнгөний эргэлт явагдаад байна. Сонгуулийн үр дүн мөнгөтэй шууд хамааралтай. 

Сонгуулиар иргэн арван сая хүртэл, ААН 30 сая хүртэлх төгрөгийн хандив өгч болно гэж заасан байгаа. Жишээлбэл, тодорхой нэг компани 19 охин компаниар дамжуулан МАН руу хандив өгсөн байгаа. Дээрээ нэг эзэнтэй хэр нь охин компаниудаараа дамжуулж ихээхэн хандив өгч байгаа. Үүнээс өөр ил тод биш өчнөөн зүйл бий. Хуулиар 10, 30 сая төгрөг өгөөд байгаа ч цаагуураа хэдэн тэрбум төгрөг өгч байна.

Тэгэхээр аль нэг ашиг сонирхол бүхий компаниас хандив авсан бол тухайн компанийн эрхэлдэг үйл ажиллагаатай холбоотой зүйл дээр шийдвэр гаргах санал хураалтын зүйлээс УИХ-ын гишүүд ашиг сонирхлын зөрчилтэй гэдгээ зөвшөөрөөд татгалздаг байх ёстой. Үүнийг Дэгийн тухай хууль дээр оруулах шаардлагатай гэлээ. 

---