УИХ-ын 2024 оны ээлжит сонгуулиар ХҮН нам 1 тэрбум 95 сая төгрөгийн хандивыг М Си Эс-ийн хамаарал бүхий охин компаниас авсан талаар тус намын дарга Т.Доржхандаас тодруулав. 

Шадар сайд, ХҮН намын дарга Т.Доржханд:

-"Эм Си Эйс” компани бидэнд ямар нэгэн нөхцөлгүйгээр хандив өгсөн. Ер нь бүх л намуудад "Эм Си Эйс” компани хандив өгсөн юм байна лээ.

Хэн нэгэн тохиролцоо дээр тулгуурласан байдлаар "Хандив өг" гэж ХҮН нам ажил хийдэггүй юм. Манай нам ил тодоор "Хандив өгөөрэй" гээд дансаа байрлуулсан. Тэгэхэд ирсэн хандив нь энэ байсан.

Улс төрийн намд санхүүжилт орж ирлээ гэхэд бид нар хянаад, "Энэ болохгүй, энэ хүний хандивыг авна" гээд шалгаад байж болохгүй.
ХҮН намын даргын хувьд хариуцлагатайгаар хэлье. Манай улс төрийн институцын хувьд хэн нэгнээс хамааралгүйгээр үйл ажиллагаа явуулдаг. Өнгөрсөн дөрвөн жилийн хугацаанд парламент дээр хэн хамгийн их шүгэл үлээсэн бэ. Парламентад ХҮН нам орж ирснээр авлигын эсрэг байр суурьтай болсон.

Бид нар хэн нэгний халаасанд ордог нам биш. Мөн иргэд, олон нийтээс намууд хандив авдаг байх хэрэгтэй. Тэгэхдээ ил тод байх нь зөв. Халааснаас бус хандиваар үйл ажиллагаагаа эрхлэх хэрэгтэй. Тийм байхад жаахан юм болохоор л улс төржүүлээд байх юм. Үүнийгээ боль гэв. 

---