УИХ-ын чуулганы нэгдсэн хуралдаанаар Авлигатай тэмцэх газрын даргыг улируулан томилох асуудлыг хэлэлцэж байна. УИХ-ын гишүүд нэр дэвшигч З.Дашдаваагаас асуулт асууж хариулт авч буй юм. Энэ үеэр УИХ-ын гишүүн Ө.Шижир байр сууриа илэрхийлж, асуулт асуув. 

УИХ-ын гишүүн Ө.Шижир:

-Авлига нь хэт их эрх мэдлийн төвлөрөл, баялгийн шударга бус хуваарилалтаас эхэлдэг гэж боддог. Тиймээс АТГ соён гэгээрүүлэх үүргээ илүү ухамсарлаж ажиллахыг хүсэж байна.

Ер нь АТГ-ын үндсэн үүрэг бол шударга бус байдал, төрийн хүнд суртлыг үгүй болгоход анхаарах ёстой. Миний гол хэлэх гэж байгаа санаа бол 2016, 2020, 2024 оны сонгуулийг угтсан төсвийн тэлэлт, тухайн онуудын 4, 5, 6 саруудад арилжааны банкнаас гарч байгаа бэлэн мөнгөний гаралт жирийн үеийнхээс 6-8 дахин өсдөг мэдээлэл байна. Сонгууль нь мөнгөний хүчин зүйлээс хамааралтай гэдгийг харуулж байгаа юм. Энэ мэдээллийг та харьцуулж хараарай.

Мөн, улс төрийн намын санхүүжилтийг заавал ярих ёстой. Намын санхүүжилт нь хуульчлагдсан авлига гэж хэлж болно. Тухайлбал, нэг жишээ авч ярихад УИХ-д суудалтай ХҮН нам нь нэг тэрбум 95 сая төгрөгийг сонгуулиар авсан байна. Үүнийхээ нэг тэрбум 45 сая төгрөгийг нэг компани, түүний хамаарал бүхий 37 охин компаниас авсан байгаа юм. Нийт санхүүжилтийн 98 хувийг нэг компаниас авсан. Энэ бол хуульчилсан авлига шүү. Ийм заваан жишээ дэлхий дахинд байхгүй.

Тэгэхээр улс төрийн намын санхүүжилтэд АТГ анхаарч ажиллахыг хүсэх байна. Үүнийг цохож хэлэх гэсэн юм. Энэ бол төрийн эрх мэдлийг хууль бусаар авах гэсэн үйлдэл юм. АТГ энэ дээр анхаарч ажиллаарай гэв. 

---