Европын орноос их хэмжээний мансууруулах бодис авч Монгол Улсын хилээр нэвтрүүлэн борлуулахыг завдсан 24 болон 34 настай хоёр залууг ЦЕГ-ын Хар тамхитай тэмцэх газрын ажилтнууд дайчлан баривчилж шалгаж байна.

Интерполоор олон улсад эрэн сурвалжилж асан, Францад оршин суудаг манай улсын харьяат М гэх эр 2024 оноос эхлэн Т гэх залуугийн хамтаар Монгол Улсад мансууруулах бодис борлуулж байсан аж. Тэд хамгийн сүүлд л гэхэд ХБНГУ-аас олон улсын шуудан илгээмжийн үйлчилгээг ашиглан ариун цэвэр, гоо сайхны бараа мэтээр баримт халхавчлан их хэмжээний буюу 844 гр мансууруулах бодис оруулж ирсэн нь тогтоогджээ.

Тэднийг өнгөрсөн сарын 18-нд Сүхбаатар дүүргийн нутгаас хар тамхиа худалдан борлуулах гэж байхад үйлдэл дээр нь ЦЕГ-ын Хар тамхитай тэмцэх газрынхан саатуулсан юм. Өдгөө тэднийг шүүгчийн захирамжаар яллагдагчаар тооцон ШШГЕГ-ын харьяа Цагдан хорих 461 дүгээр ангид хорьж буй бөгөөд мансууруулах бодисыг нь холбогдох лабораторид шинжлүүлж байна.

Зарим шинжилгээний дүгнэлт гарсныг эх сурвалжууд мэдээлээд НҮБ-ын Сэтгэцэд нөлөөлөх бодисын тухай 1971 оны конвенцын II жагсаалтад багтсан мансууруулах бодис болох нь батлагдсан. Тэднийг Эрүүгийн хуулийн 20.7-3.3-ын “Мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгоор хууль бусаар олж авсан, хадгалсан, тээвэрлэсэн, илгээсэн, худалдсан хэргийг улсын хилээр нэвтрүүлж үйлдсэн” гэх заалтын дагуу яллагдагчаар тооцсон байна.

Дээрх хоёр хүнээс гадна тэдний хамсаатан Т, Н нарыг саатуулан худалдан борлуулах гэж байсан багагүй хэмжээний мансууруулах бодис, жин хэмжүүр зэргийг хураан авсан гэнэ. 

---