"Авлигатай тэмцэх бодит ажлууд хийгдсэн учраас АТГ-ын дарга З.Дашдавааг улираан томилохыг МАН-ын бүлэг дэмжсэн" гэж УИХ дахь МАН-ын бүлгийн дэд дарга А.Ариунзаяа хэлж байна. 

УИХ дахь МАН-ын бүлгийн дэд дарга А.Ариунзаяа:

-АТГ-ын даргыг нэр дэвшүүлэх бүрэн эрхийнхээ дагуу ерөнхий сайд Л.Оюун-Эрдэнэ улираан томилуулахаар нэр дэвшүүлж байгаа талаараа УИХ-ын намын бүлгүүдэд танилцуулга хийж байна. МАН-ын улс төрийн шийдвэр гаргаж тус асуудлыг дэмжсэн. Тодруулбал, Авлигатай тэмцэх бодит ажлууд хийгдсэн учраас АТГ-ын дарга З.Дашдавааг улираан томилохыг МАН-ын бүлэг дэмжсэн гэж ойлгож болно. 

Ардчилсан намын бүлгийн хуралд ерөнхий сайд мөн оролцож байна. Ингээд Хууль зүйн байнгын хорооны хуралдаанаар ороод УИХ-ын чуулганы хуралдаанаар хэлэлцэгдэнэ.

АТГ-ын даргыг зургаан жилийн хугацаагаар томилж, нэг удаа сунгах хуультай байгаа. Манай улсын авлигын төсөөллийн индекс сайжраагүй. Энэ утгаараа АТГ ажлаа сайн хийсэн үү гэдэг асуудал зүй ёсоор тавигдаж байгаа. АТГ-ын ажлыг авлигын төсөөллийн индексээр дүгнэх нь учир дутагдалтай юм. Энэ үзүүлэлтийг олон улсын төрийн бус байгууллага гаргадаг судалгаа.

2007 оныг 2023 онтой харьцуулахад гомдол мэдээллийн шийдвэрлэлт 6.9 дахин нэмэгдсэн. 2007 онд 85 эрүүгийн хэрэгт мөрдөн шалгах ажиллагаа явуулж байсан бол 2024 онд 1863 хэргийг шалгасан байна. Түүнчлэн гэмт хэргийн нөхөн төлөлтийн дүн 2007 онд 5.3 сая төгрөг байсан бол 2023 онд 238.6 тэрбум төгрөг болж өсжээ. Энэ нь төсөөллийн индексээсээ илүү хийж гүйцэтгэсэн ажлын үр дүн юм гэв. 

---