Амьтны тухай хуульд нэмэлт өөрчлөлт оруулах гэж байна. Тус хуулийн төслийг санаачилсан УИХ-ын гишүүн О.Амгаланбаатар цаг үеийн асуудлаар мэдээлэл өгөв.

УИХ-ын гишүүн О.Амгаланбаатар:

-УИХ-ын чуулганы хуралдаанаар Амьтны тухай хуульд нэмэлт өөрчлөлт оруулах асуудлыг хэлэлцэх эсэхийг хэлэлцсэн.

Тус хуульд "Малчид амь нас, мал, хөрөнгөө хамгаалж чоно алсан тохиолдолд ямар нэг зөвшөөрөл авахгүй. Дээр нь ямар нэг торгууль төлөхгүй" гэдэг агуулгатай өөрчлөлт орж байгаа.

Монгол Улсын 19 аймагт чоно маш их элбэг болсон. 1986 оноос хойш чонын тоо толгойн судалгааг огт хийгээгүй байна. Говь-Алтайн аймгийн Бигэр сумын малчны хотонд 218 богийг идсэн асуудал гарсан. Малчид тус асуудлыг маш ихээр ярьдаг. Чононд баригдаж амь насаа алдсан нэг тохиолдол гарсан. Бариулж хазуулсан олон тохиолдол байна.

Одоо хүчин төгөлдөр үйлчилж байгаа хуулиар тав хоногийн хугацаанд сумын засаг даргаас зөвшөөрөл авч 246 мянган төгрөг төлж агнана гэж байгаа. Харин зөвшөөрөлгүй агнасан тохиолдолд 2 сая 260 мянган төгрөгийн торгууль төлөхөөс гадна буу, унаа тэргийг нь хураан авдаг. Энэ бол амьдралд нийцэхгүй хууль гэв. 

---