УИХ-ын дарга Д.Амарбаясгалан стратегийн орд газартай холбоотой мэдээллийг чуулганы хуралдаанд мэдээлэх үүрэг өгөв. 

УИХ-ын гишүүн О.Батнайрамдал:

-Үндсэн хуулиар олгогдсон эрхийнхээ хүрээнд бид стратегийн орд газруудын талаарх мэдээллийг мэдмээр байна. Сүүлийн хорин жилийн аудитын дүгнэлтийг авах гэсэн нууц гэдэг юм билээ. Юуг нь ч яг нуугаад байдаг юм. Мэдэх эрхийг 3.5 сая иргэндээ олгомоор байна.

ЗГХЭГ-ын дарга Н.Учрал:

-Монгол Улсын ерөнхий сайдын захирамжаар Үндэсний баялгийн сангийн тухай хуулийг хэрэгжүүлэх ажлын хэсгийг байгуулаад ажиллаж байна. 2007 онд УИХ-аас гарсан тогтоол дээр 15 стратегийн ордыг тодорхойлсон. Жилийн дараа нэгийг нэмсэн. Тогтоолын хоёр дээр 39 стратегийн ордыг жагсааж бичээд стратегийн ордод хамааруулах нь зөв үү буруу юу гэдгийг УИХ-аар шийд гээд 18 жилийн нүүрийг үзэж байна. Яагаад энэ ажил хийгдээгүй вэ гэдэг дээр анхаарах хэрэгтэй. Нууцад хамааруулсан асуудал байгаа бол үүнийг заавал эргэж харах ёстой. Ордуудыг нээлттэй болгож, иргэдийн мэдэх эрхийг хангах чиглэлд бодитой ажлуудыг хийгээд явна.

УИХ-ын дарга Д.Амарбаясгалан:

- Энэ чиглэлээр УИХ-ын чуулганд нээлттэй мэдээлэл өгөх үүргийг өнөөдрийн хэлэлцэж байгаа асуудалтай холбогдуулан өгөх нь зүйтэй гэж бодож байна. Засгийн газар бэлтгэл хангаад, хэзээ өргөн бариад мэдээлэл хийхээ шийдвэрлэх нь зүйтэй гэв.

 

---