"Энержи Ресурс"-ийн эзэмшиж буй Ухаа худаг ордыг хуульд нийцүүлэх тухай тогтоолын төслийг Засгийн газраас УИХ-д өргөн барихаар болсон.

Харин тус төсөл хэлэлцэгдэх үед сонгуулийн үеэр хандив авсан УИХ-ын гишүүд тус компанийн талд үйлчлэх үү, үгүй юу гэдэг асуулт нийгэмд байна. Тэгвэл Гадаад харилцааны сайд Б.Батцэцэг 2024 оны сонгуулиар MCS ХК-иас 170 гаруй сая төгрөгийн хандив авсан гэх мэдээлэл гараад байгаа юм. Тэгвэл тус асуудлаар Гадаад харилцааны сайд Б.Батцэцэг дараах мэдээллийг өгчээ. 

Гадаад харилцааны сайд Б.Батцэцэг:

-Надад ашиг сонирхлын зөрчил байхгүй. Засгийн газрынхаа бодлогыг дэмжинэ. Баялагийн сангаа бид дэмжих ёстой. MCS ХК олон гишүүнд хандив өгсөн байна лээ. Сая намайг хангайн бүсэд нэр дэвшихэд MCS компани хандив өгсөн. MCS компанийн захирал Ж.Оджаргал гуайг би танина. Баянхонгор аймгийн харьяат хүн. Тийм учраас дэмжиж хандив өгсөн байх гэж бодож байна. Хуулийн дагуу хандивыг тооцоод тайлан гаргасан. Ямар нэг зөрчил гаргаагүй. MCS компани намайг дэмжиж хандив өгсөнд баярлалаа гэж хэлмээр байна.

Ж.Оджаргал гуай хэвлэлд ярилцлага өгсөн байна лээ. "Засгийн газрын бодлогыг дэмжинэ. Хамтарч ажиллана. Хэлэлцээ хийхэд бэлэн" гэдгээ илэрхийлсэн байна лээ гэв. 

---