Монгол Улсын Ерөнхий сайд Л.Оюун-Эрдэнэ чуулганы хуралдааны үеэр дараах байр суурийг илэрхийлэв. 

Ерөнхий сайд Л.Оюун-Эрдэнэ:

-Хүний амьдралын чанар шиг том мега төсөл гэж хаана ч байхгүй. Энэ бүх мега төслүүд цаанаа амьдралын чанар, орон сууцжуулалт, сургууль, цэцэрлэг энэ бүх асуудлыг шийдэхийн төлөө байгаа. Эдийн засгаа тэлж, мөнгөтэй болох ёстой. Монгол Улсын дотоодын нийт бүтээгдэхүүн гурван жилийн өмнө 40 их наяд төгрөг байсан бол одоо 80 их наяд болсон. Яаж бид эдийн засгийн бааз сууриа хадгалах вэ? Яаж бид дутуу байгаа дэд бүтцийн асуудлаа хурдан шийдвэрлэх вэ. Бидэнд 150 мянган айлын орон сууц, аймгуудыг хооронд нь, аймгуудаа боомтуудтайгаа холбосон зам, нийслэлийг хагас тойрсон авто зам хэрэгтэй. Улаанбаатар хотын гэр хорооллыг холбосон дэд бүтэц хэрэгтэй. Энэ бүхнийг шийдэхэд хамгийн багадаа 10 тэрбум ам.доллар хэрэгтэй. Энэ мөнгийг эдийн засаг тэлж байж шийднэ. Тийм учраас л эдгээр мега төслүүдийг хэрэгжүүлж, эдийн засгийн багтаамжаа тэлэхийн төлөө, татварын бааз сууриа нэмэгдүүлэхийн төлөө хэрэгжүүлэх гэж хичээж байна.

Өнөөдрийн бидний баталж байгаа төсөл урт хугацаанд тогтвортой боломжит худалдааг засгийн газар хооронд хэрэгжүүлнэ. Энэ төсөл 16 жилийн хугацаанд хэрэгжинэ.

Намрын чуулганы хуралдааны үеэр нүүрс 170 ам.доллар байсан. Хаврын чуулганаар 70 ам.доллар болсон байна. Маш богино хугацаанд дэлхий дээр олон зүйлс болж байна. Ирэх сарын 02-ны өдрөөс АНУ 25 хувийн татварыг бүх улсын машин дээр тавих гэж байна. Цахилгаан машины 62 хувийг манай урд хөрш үйлдвэрлэдэг. Үүнээс болж шок үүсэж байна. Энэ зөвхөн төмөр зам холболт 70 жилийн дараа хийгдэж байгаа гэхээсээ илүүтэйгээр Монгол Улсын урт хугацааны харилцан итгэлцэл дээр тулгуурласан харилцан ашигтай худалдааг бид хөрштэйгөө хийж байна. Энэ гэрээ батлагдсанаар ОХУ, БНХАУ, гурван улсын хамтарсан төслүүд хэрэгжиж эхлэх боломж бүрдэнэ. Бид төмөр замын баруун зүүн коридорын төслүүдийг яриа хэлэлцээрийн түвшинд оруулна гэв. 

 

---