Тус форумд хотын найман дүүрэг, 13 аймгийн эмч, мэргэжилтнүүд чуулна. ХӨСҮТ өнгөрсөн есдүгээр сараас эхлэн Монголын анхны AST удирдамжийг боловсруулж байна. Үүнд Ёнсэй ЭМТ нь Солонгосын AST удирдамж журмын монгол орчуулгыг хүргүүлж холбогдох зөвлөгөөг өгчээ. Энэхүү фopyм нь ХӨСҮТ-ийн боловсруулсан AST удирдамж журмын талаар мэргэжилтнүүдээс санал хүсэлтийг авч, илүү сайжруулж эцсийн хувилбар гаргах зорилготой юм.

БНСУ, Монгол Улсын хамтран хэрэгжүүлж буй Миракл төслийн хүрээнд "Бичил биетний эмэнд тэсвэржилтийн форум-2025" зохион байгуулагдаж байгаа бөгөөд төслийн удирдагч, БНСУ-ын Ёнсэй их сургуулийн Анагаахын сургууль, Халдварт өвчний тасгийн эмч, профессор Ём Жүн Соб Монгол Улсад хүрэлцэн ирж дараах мэдээллийг өглөө.

БНСУ-ын Ёнсэй их сургуулийн Анагаахын сургууль, Халдварт өвчний тасгийн эмч, профессор Ём Жүн Соб: 

-Сайн байна уу. Намайг Ём Жүн Соб гэдэг. БНСУ-ын Ёнсэй их сургуулийн Анагаахын сургууль, Халдварт өвчний тасгийн эмч профессор хүн байна. Би БНСУ, Монгол Улсын хамтран хэрэгжүүлж буй Миракл төслийн удирдагчаар ажиллаж байна. Манай Миракл төсөл нь 2023 оны зургаадугаар сараас 2027 он хүртэл үргэлжлэх Халдварт өвчинтэй тэмцэх чадавхыг сайжруулахтай холбоотой төсөл юм. Уг төсөл маань үндсэн гурван том зорилттой хэрэгжиж байгаа.

• 1. Бичил биетний тэсвэржилтийн тандалтын тогтолцоог бий болгон үүгээр дамжуулж Монголын бичил биетний тэсвэржилтийн нөхцөл байдлыг тодорхойлох,
• 2. Солонгосын өвчний хяналт сэргийлэлтийн Агентлаг(KDCA) болон ХӨСҮТ хамтран Монголд шинэ төрлийн халдварт өвчин дэгдэхэд хэрхэн түргэн шуурхай хариу арга хэмжээ авах талаар үзүүлэх сургалтыг явуулах,
• 3. Халдварт өвчний талбарын тархвар судлал ба хариу арга хэмжээг сайжруулах үүднээс хамтарсан олон төрлийн сургалтыг явуулах, зэрэг байна.

Ингээд 2023 оны долоодугаар сараас эхлэн манай төсөл хэрэгжиж эхэлснээс хойш хугацаанд ХӨСҮТ-ийн Нян судлалын лабораторийг улсын стандарт лаборатори болгоход тус дэм болох үүднээс Антибиотикт мэдрэг чанарын шинжилгээг хийх гол тоног төхөөрөмжүүдийг оруулж ирж дэмжлэг үзүүлсэн ба эдгээрийг хэрхэн ажиллуулах тухай сургалтуудыг эмч мэргэжилтнүүдэд явуулаад байна.

Шинэ төрлийн халдварт өвчний эсрэг авах хариу арга хэмжээг сайжруулах үүднээс KDCA болон ХӨСҮТ-ийн хамтарсан үзүүлэх сургалтын сценарыг боловсруулсан ба энэ оны  дөрөвдүгээр сард Монголд тус хоёр байгууллага болон бусад хамаарал бүхий байгууллагын холбогдох мэргэжилтнүүд цугларан үзүүлэх сургалтыг зохион байгуулахаар төлөвлөсөн.

Сүүлд нь Халдварт өвчний талбарын тархвар судлал ба хариу арга хэмжээг сайжруулах үүднээс өнгөрсөн жилээс эхлэн тогтмол ХӨСҮТ-ийн талбарын тархвар судлаачдыг БНСУ-д урин сургалтад хамруулж байгаа ба Монголд ч гэсэн KDCA-ын мэргэжилтнүүд ирэн сургалт хичээлийг орж байна.

Ялангуяа энэ тав дах өдөр буюу гуравдугаар сарын 21-нд ХӨСҮТ-ийн Нян судлалын лабораторийн нян судлаач нар болон бид хамтраад өмнө нь Монгол Улсад байгаагүй Антибиотикт мэдрэг чанарын шинжилгээг стандартчилах удирдамжийг боловсруулсан ба үүнийгээ Монголын эмнэлгийн байгууллагууд даган мөрдөж ашиглахуйц түвшинд хүргэхээр AMR Форумыг зохион байгуулах гэж байна.

Өнгөрсөн хугацаанд стандарт удирдамж байхгүйн улмаас эмнэлэг тус бүрийн шинжилгээ хийх аргачлал өөр байснаар цуглуулсан Бичил биетний тэсвэржилтийн материалууд тогтмол байж чадаагүй. Тиймээс энэ удаагийн форумаар дамжуулан боловсруулсан стандарт удирдамж нь бүх лабораториуд адилхан ашиглаад эхэлбэл цаашдаа илүү найдвартай бодит Монголын бичил биетний тэсвэржилтийн нөхцөл байдлын материалуудыг гаргаж чадна гэж найдаж байна.

Манай төслийн хүрээнд одоогоор Бичил биетний тэсвэржилтийн тандалтын тогтолцооны сүлжээнд зарим эмнэлгүүд нэгдээд байгаа ба цаашдаа илүү олон эмнэлгийн байгууллагуудыг нэгтгэн хоорондоо дата мэдээллээ солилцон манай төсөл дуусах үеэр Монголдоо тэргүүлэгч нэгдсэн сүлжээний тогтолцоо бий болгохоор зорьж байна.

Бидний үүсгэсэн Бичил биетний тэсвэржилтийн тандалтын тогтолцоо илүү өргөжин хөгжвөл цаашдаа Монголын Бичил биетний тэсвэржилтийн удирдлагын бодлогыг бий болгоход тус болох бөгөөд энэхүү Бичил биетний тэсвэржилтийн дата нь өвчтөнийг эмчилж буй бүх эмнэлэг, эрүүл мэндийн байгууллагуудын эмч нарт антибиотикийн сонголтод маш чухал гарын авлага болно гэж итгэж байна.

---