Засгийн газрын өнөөдрийн хуралдаанаар Зөвшөөрлийн тухай хуульд нэмэлт, өөрчлөлт оруулах тухай хуулийн төсөл болон дагалдах бусад хуулийн төслүүдийг хэлэлцсэн байна. Ингээд тус хуулийг УИХ-д өргөн мэдүүлэхээр болжээ. Тус хуульд нэмэлт өөрчлөлт орсноор мөрийтэй тоглоомын агент болон мөрийтэй тоглоом зохион байгуулж байгаа этгээд, тоглож байгаа, сурталчилж байгаа бүх үйлдэлд эрүүгийн хариуцлагыг чангалж өгөхөөр тусгажээ. 

ЗГХЭГ-ын дарга Н.Учрал:

-2024 онд эдийн засгийн гэмт хэрэг 200 бүртгэгдэж, 417.2 тэрбум төгрөгийн хохирол учирсан гэх судалгааны дүн байна. Эдгээрийг насны бүлгээр авч үзвэл 19-29 насны иргэд 9.2 хувь, 30-39 насны иргэд 47.7 хувийг эзэлж байна. 6000-77000 ам.долларыг хүртэлх гэрээг байгуулсан. Санхүүгийн мөрдөн шалгах ажиллагааны дүнг нэгтгэн дүгнэвэл 1xbet-ээс манай улс руу зар сурталчилгаанд зориулж 976 сая ам.доллар шилжиж орж ирсэн. Харин манай улсаас 1.7 их наяд төгрөгийн 500 сая ам.доллар гадаад улс руу шилжсэн байна. Өнгөрсөн хугацаанд цахим мөрийтэй тоглоом явуулдаг 6036 домэйн хаягийг хязгаарласан ч линкийг сольж, VPN ашиглаж энэ үйл ажиллагааг явуулсан хэвээрээ байна. Зөрчлийн хуулиар 13.5 сая төгрөгийн торгууль ноогдуулсан байгаа юм. Иймд бид Зөвшөөрлийн тухай хуульд өөрчлөлт оруулж, үйл ажиллагаа явуулж байгаа бүх төрлийн аж ахуй нэгжүүдийг, цахим мөрийтэй тоглоомын үйл ажиллагааг хөхүүлэн дэмждэг агент, жуучлагчийн нэртэй үйл ажиллагаануудыг энэ хуулиар бүрэн хориглохоор өргөн мэдүүлнэ. Агент болон мөрийтэй тоглоом зохион байгуулж байгаа, тоглож байгаа, сурталчилж байгаа бүх үйлдэлд эрүүгийн хариуцлагыг чангалж өгнө.

Хууль батлагдаад хэрэгжиж эхэлснээр IOS болон App store, Мета компани руу шаардлага тавина. Улмаар IOS болон APP store-оор бүх төрлийн цахим мөрийтэй тоглоомын аппликэйшнүүд татагдахаа болино. 

Хэрвээ хууль зөрчиж цахим мөрийтэй тоглоомыг өөр линкээр, VPN-ээр татан тоглож, тоглоом зохион байгуулж, зуучилж байвал хуулийн хариуцлага хүлээлгэнэ. Өөрөөр хэлбэл, цахимаар мөрийтэй тогловол Монголбанкнаас гадагш урсаж буй валютыг хязгаарлан, царцаах боломж хуулийн хүрээнд бий болно гэв.

---