“Элдэв эрдэнэт” хэмээх модон могой жилийн Цагаан сарын баярыг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг буулгаж, нэр бүхий эрхмүүдэд төрийн дээд цол, одон, медаль хүртээлээ.

Тэдний нэг нь УДЭТ-ын жүжигчин О.Гэрэлсүх юм. Тэрбээр Монгол Улсын Гавьяат жүжигчин цол хүртсэнийхээ дараа сэтгэгдлээ хуваалцлаа.

МУГЖ О.Гэрэлсүх: 

-1987 онд 14 настай байхдаа “Амьдралын нахиа” МУСК-нд тоглож жүжигчин болох гараагаа эхлүүлж, 40 шахам жил энэ салбартаа үнэнчээр зүтгэлээ. Өнөөдөр өглөө эрт босч аавынхаа хөрөгт мөргөөд гарч ирсэн. Миний аав Отгон бол Туваа-Урианхай гаралтай Баян-Өлгий аймгийн уугуул хүн юм. Энэ өдөр аавыгаа хамгийн их үгүйлэн саналаа. Төр түмнээсээ ийм том цолыг хүртэнэ гэж бодож явсангүй. Туурга тусгаар МУ-ынхаа төр засаг, түмэн олонд үнэлэгдэж, МУГЖ цол хүртсэндээ туйлын их баяртай байна хэмээв. 

---