"70 орчим насны хоёр иргэн ахуйн хүрээнд архидан согтуурч нэгнийхээ амь насыг хохироосон3 гэх дуудлага мэдээлэл цагдаагийн байгууллагад энэ сарын 21-ний өдөр бүртгэгджээ.

Тус хэрэгт мөрдөн шалгах ажиллагааг явуулж байна. Өнгөрсөн онд цагдаагийн байгууллагад бүртгэгдсэн нийт гэмт хэргийн 15 хувийг буюу 6862 гэмт хэргийг иргэд архи согтууруулах ундааны зүйл хэрэглэсэн үедээ үйлдсэн гэх тоо мэдээ байна.

Өнгөрсөн жилийн сар шинийн баяр, амралтын өдрөөр буюу 2024 оны 02 дугаар сарын 09-өөс 02 дугаар сарын 13-ны өдөр хүртэлх хугацаанд цагдаагийн байгууллагад нийт 6525 дуудлага мэдээлэл бүртгэгдсэн. Үүнийг өмнөх онтой харьцуулахад дуудлага, мэдээлэл 9.7 хувиар өссөн үзүүлэлт аж.

Иймд сар шинийн баяр, амралтын өдрүүдэд та бүхэн согтууруулах ундааны зүйлийг хэтрүүлэн хэрэглэхгүй байж, өөрийн болон бусдын амь нас, эрүүл мэндийг хамгаалахыг ЦЕГ-аас зөвлөв.

---