Засгийн газрын хуралдаанаас сар шинийн баяраар амрах өдрийг сунгасантай холбогдуулж, Гэр бүл хөдөлмөр нийгмийн хамгааллын сайд Л.Энх-Амгалан дараах мэдээллийг өгөв. 

Гэр бүл, хөдөлмөр, нийгмийн хамгааллын сайд Л.Энх-Амгалан:

-Монгол үндэстний уламжлалт баяр Цагаан сар, билгийн тооллын хаврын тэргүүн сарын шинийн нэгэн тасарч, шинийн хоёрон гурваны өдөр бямба, ням гаригт тохиож байгаатай холбогдуулан 2025 оны гуравдугаар сарын 03, 04, 05 буюу ирэх даваа, мягмар, лхагва гаригт ажилтан, албан хаагчдыг амрааж, 2025 оны ажлын жилд багтаан нөхөж ажиллуулах зохицуулалт хийхийг Засгийн газрын гишүүд, бүх шатны засаг дарга, төрийн болон орон нутгийн өмчит хуулийн этгээдийн удирдлагад даалгасан. Хувийн хэвшлүүдийг бид ажилтнуудаа нэгдэх, хоёр дахь, гурав дахь өдөр амраагаач ээ гэж уриалж байгаа.

Хөдөлмөрийн хуулиар баяр амралтын өдөр таарах юм бол хөдөлгөдөг эрх нь Засгийн газарт байсан, энэ эрх байхгүй болсон. Шинийн 1, 2, 3-нд заавал амрах ёстой ш дээ гэсэн хуулийн логик байна гэдэг дээр тайлбар авахаар Улсын дээд шүүхэд хандсан. Үүн дээр цаг алсан тал бий. Засгийн газрын өнөөдөр гаргаж байгаа тогтоол бол төсвийн ерөнхийлөн захирагч нарт ийм зохицуулалт хийгээч ээ, энэнээс өөр үр дагавар багатай хуулийн шийдэл байхгүй гэж үзэж байгаа. Тэгэхээр хагас сайн, бүтэн, нэгдэх, хоёр дахь, гурав дахь өдөр амарна. Дөрөв дэх өдөр ажлын өдөр байна гэдэг нэг мөр ойлголттой болох ёстой.

Хаврын чуулган эхлэхээр ирэх жилийн цагаан сар, энэ жилийн наадам амралтын өдөр таарах, шинийн нэгэнгүй, шинийн хоёронгүй, шинийн гурвангүй, битүүнгүй жилүүд тохиовол ажлын өдөр лүү шилжүүлдэг зохицуулалттай болъё гэдэг шийдвэр өнөөдөр Засгийн газрын хуралдаанаас гарч байна гэв. 

---