Эдийн засаг хөгжлийн сайд Л.Гантөмөр цаг үеийн асуудлаар өнөөдөр мэдээлэл хийв. 

Эдийн засаг хөгжлийн сайд Л.Гантөмөр:

-Өнгөрсөн жил бид эдийн засгийн өсөлтөө 5.6 хувь гэж харж байсан бол оны төгсгөлд 4.9 хувьтай гарсан. Нэрлэсэн дүнгээр эдийн засаг 80 их наяд төгрөгт хүрч, нэг хүнд ногдох ДНБ 6890 ам.долларт хүрээд байна. Эдийн засгийг чирж байгаа уул уурхайн салбарын өсөлт 10.8 хувьтай байна. Алтны олборлолт төсөөлснөөс таван тонноор багассан. Алтны үйлдвэрлэл, олборлолтыг нэмэгдүүлэх шаардлага байгаа гэж үзэж байна. Энэ талаар Засгийн газраас тодорхой ажлуудыг хийж хэрэгжүүлж байна. Хөдөө аж ахуйн салбар 28.7 хувиар буурсан нь эдийн засгийн өсөлтийг бууруулахад голлон нөлөөлсөн. 9.4 сая мал зудад хорогдсон. Түүнчлэн боловсруулах үйлдвэрлэл ахицгүй байсан. Үйлдвэржүүлэх бодлогодоо онцгой анхаарах шаардлагатайг харуулж байна.

Эрчим хүчний салбар 5.2 хувийн өсөлттэй байсан. Өнөөдрийн байдлаар экспорт 1.6 тэрбум ам.доллартой байна. Нүүрсний биет хэмжээ долоон хувиар нэмэгдсэн. Гэсэн ч үнэ 35 хувиар унасан. Бидний төсөөлснөөс үнэ 10 хувийн уналттай явж байна. Харин нөгөө талдаа зэсийн баяжмал өндөр өсөлттэй байгаа. Оюутолгойн гүний уурхай ашиглалтад орсноор зэсийн экспортын хэмжээ эрс нэмэгдэж байна. Тус компанийн талбай дээр 200 сая ам.долларын зэс байна. Үүнийг экспортлох юм бол 1.8 тэрбум ам долларын бүтээгдэхүүн байна гэсэн үг. Үүнийг ямар нэг саадгүйгээр экспортод гаргах ажлыг шийдэх ёстой. Төмрийн хүдрийн худалдаа эрчимжиж байна.

Харин газрын тосон дээр үүссэн татварын маргаан болон бусад зүйлсээ хэрхэн шийдэх вэ гэдэг ойлгомжтой болгох хэрэгтэй байна. Газрын тосны үйлдвэр ашиглалтад орсон ч гэсэн бүтээгдэхүүн түүхий эдийн асуудлаа яах вэ гэдэг зүйлтэй тулгарч байна. Хаврын чуулганаар энэ асуудлыг шийдвэрлэх шаардлагатай байна. 

2024 онд импорт асар ихээр нэмэгдсэн тоон үзүүлэлттэй байна. Энэ жил энэ тоо улам нэмэгдэх хандлагатай байна. 2024 оны нэгдүгээр сард 369 сая ам.долларын бараа бүтээгдэхүүн авч байсан бол энэ жилийн нэгдүгээр сард 402 сая ам.долларын бүтээгдэхүүн авчээ. 

2024 оны нэгдүгээр сараас 2025 оны нэгдүгээр сарын хооронд зээлийн гаралт 31 .2 хувиар нэмэгдсэн. Цалингийн зээл 44 хувь, тэтгэврийн зээл 29 хувь, хадгаламж барьцаалсан зээл 19 хувиар өссөн байна. Нийт зээлд эзэлж байгаа зээлийн 31 хувь нь хэрэглээний зээл. Хэрэглээний зээл нь явсаар байгаад машин, хувцас руугаа очиж байна. Хамгийн ноцтой нь банк, банк бус дээр давхар зээлтэй 350 мянган иргэн байна. Банкнаас зээл авсан, банк бусаас зээл авсан. Энэний өр авлагын харьцаа 79 хувьд хүрсэн. Олж байгаа орлогынхоо 80 хувийг зээлдээ төлдөг, үлдэж байгаа 20 хувиар нь амьдардаг. Банкан дээр байгаа зохистой харьцаа бол 55-60 хувь байх ёстой. Олж байгаа орлогынхоо 55 хувийг зээлдээ төлж, үлдсэн мөнгөөр нь амьдрах. Ингэж байж банк болон санхүүгийн байгууллага эрүүл байдаг гэв. 

---