"Улсын төсвөөр хайгуул хийсэн ордыг авч банканд барьцаалаад долоон гэр бүл баяжсан. Төрөөс стратегийн орд дээрэмдэж авсан нөхөдтэй бол хэлцэл хийхгүй, ордоо буцааж авна" гэж Засгийн газрын БЭТ Ж.Батзандан хэлж байна.

Засгийн газрын БЭТ Ж.Батзандан:

-Монгол Улсын Засгийн газар 2025 оны хоёрдугаар сарын 05-ны өдөр тогтоол гаргаж уул уурхайн салбар тэр дундаа стратегийн орд газарт нүүрлэсэн хулгай луйвар, лицензийн наймаа, бузар булай болгонтой тэмц гэж намайг БЭТ-өөр томилсон. Бузар булайг илчилж, орлого төвлөрүүл гэж томилсон юм.

МАНАН бүлэглэлээс баялаг ордуудаа буцааж авъя гэж хэн 40 мянган иргэдтэйгээ жагсаж байсныг та бүхэн санаж байгаа байх. Үүний үр дүнд Үндсэн хуулийн өөрчлөлт хийгдэж стратегийн ордуудын өгөөжийн дийлэнх Баялагийн санд төвлөрч Монголын ард түмэнд тэгш хуваарилагдах ёстой гэдэг заалт орсон. Өнөөдөр энэ ажлаа үргэлжлүүлэхээр томилолт аваад байна.

Манай улсад стратегийн 55 орд байна. 2007 оны стратегийн орд газрын жагсаалтыг баталсан байдаг. 18 жилийн өмнө. Стратегийн ордыг хулгайлаад, идэж уугаад дуусаж байна.

Монголын ард түмнийг 34 жил зальдсан уул уурхайн луйврыг ил зарлаж явахгүй бол Засгийн газрын БЭТ гэж нэрлэгдээд хэрэггүй. Онцгой байдал зарласан үед БЭТ томилдог. Яг одоо ийм нөхцөл байдал үүсчихээд байна.

1997-2004 оны хооронд Ашигт малтмалын газраар ажиллаж байсан Д.Жаргалсайхан гэх хүн улсын төсвөөр хайгуул хийсэн стратегийн ордуудыг хувийн компаниудад албан тушаалаа ашиглаад олгосон байна. Энэ хүн одоо Цайрт минералаас хувь эзэмшээд явж байна. Бүх стратегийн ордыг авлига албан тушаалын замаар олгосон байна. Өөрөө гурван стратегийн орд газрын далд эзний үүргийг гүйцэтгэж байна. Хулгайч нартаа хэлцэл хийх үү? Хулгайлагдсан ордоо буцааж авах уу гэдэг хоёр сонголт байна. Би Засгийн газар, УИХ-д тодорхой саналууд тавина. ҮАБЗ-д энэ талаарх мэдээллийг өгнө. Хулгайч нартай тохирох хүн БЭТ-ээр тавигдана гэж бодож байсан байх тийм зүйл болсонгүй.

Ховд аймагт байдаг Хөшөөтийн уурхайг арван компанид хуваагаад өгчихсөн байна. Нөөцийг нь дараад бүртгүүлчихсэн байх жишээтэй. Удахгүй УИХ-д оруулж стратегийн орд болгоно гэдгийг хэлье. Орд бүрийн ард нэг сайд, эсвэл УИХ-ын гишүүд байна. Одоо энэ завхралыг зогсооно.

Ерөнхий сайд өчигдрийн Засгийн газрын хуралдааны үеэр “Баялгийн хулгайг зогсоож, ард түмэндээ ашиг хүртээхгүй юм бол хувьсгал гарна шүү” гэж хэлсэн. Монголын ард түмэн 2019 оных шигээ төв талбай дээр 100 мянгуулаа цуглаж, ордуудаа буцааж авахаас өөр аргагүй юм.

Улсын төсвөөр хайгуул хийсэн ордыг авч банканд барьцаалаад долоон гэр бүл баяжсан.Төрөөс стратегийн орд дээрэмдэж авсан нөхөдтэй бол хэлцэл хийхгүй, ордоо буцааж авна гэв. 

---