Менингококкт халдварын дэгдэлтийн “оргил үе” буюу гуравдугаар сард тохионо гэж Эрүүл мэндийн яамнаас мэдээлж байна.

Иймд Цагаан сарын баярын бэлтгэл хийх, баярын өдрүүдийг тэмдэглэн өнгөрүүлэхдээ олон хүн цугларсан газарт бага насны хүүхдийг дагуулж явахгүй байх, золгохдоо бага насны хүүхдийг үнсэхгүй байхыг зөвлөж байна. Түүнчлэн амны хаалт зүүж, гараа халдваргүйтгэх, ам, хоолойг давс, нимбэг, сармисны уусмалаар ээлжлэн зайлах, гэр орондоо агаар сэлгэлт сайтар хийхийг зөвлөлөө.

Учир нь менингококкт халдварыг үүсгэгч нянгийн үржих таатай температур нь 36-37 хэмийн дулаан, чийгтэй орчин бөгөөд өвчилсөн хүн, хамар, залгиурын үрэвсэлтэй хүн, нян тээгчээс агаар дуслын замаар тархдаг байна.

Судалгаанаас үзэхэд манай улсад менингококкт халдвараар өвчилсөн хүмүүсийн 84 хувийг 0-14 насны хүүхэд эзэлж байгаа юм.

---