Гэр бүлийн зургаан хүн угаартаж нас барсан хэргийн хохирогчтой холбоотой зарим эмзэг мэдээллийг задруулсан хэрэг гарсан. Үүнтэй холбоотойгоор ХЗДХ-ийн сайд О.Алтангэрэл мэдээлэл өгөв.  

ХЗДХ-ийн сайд О.Алтангэрэл:

-Хувь хүний нууцыг задруулсан бол эрүүгийн хуулиар шийтгэгдэх хуулийн заалттай. Агаарын бохирдлын асуудалд хяналт тавих үүрэгтэй, салбар бүрийн мэргэжилтнүүд дундаа мэдээлэл солилцдог вайбэр групп байна. Утааны нөхцөл байдлын талаарх мэдээллийг солилцдог юм билээ. Тэр группэд байгууллагуудын чиглэл, чиглэлийнхээ хүрээнд мэдээлэл тавьдаг. Тухайлбал, үзлэг шалгалт хийсэн, утаа мэдрэгч суурилуулсан зэрэг мэдээлэл цагдаагийн байгууллагаас өгөгдсөн. Мэдээлэл хэлбэрээр олон нийтийн сүлжээнд цацагдсан мэдээлэл нь тухайн группийн мэдээллүүдийг нэгтгэн боловсруулж, цацсан болох нь урьдчилсан байдлаар тогтоогдсон.

Энэ хэрэгт холбогдуулж иргэн Б-г бусад дөрвөн хүний хамт хэрэг үүсгэн шалгаж эхэлж байгаа. Ямар нэг төрийн байгууллагын харьяалалгүй хүн. Мөрдөн шалгах ажиллагаа явуулж, эрүүгийн хэрэг үүсгэсэн. Тухайн иргэдийг гэм буруутай эсэхийг шүүх л тогтооно.

Хэрэгт холбогдон шалгагдаж байгаа Б гэгч нь хэвлэл мэдээллийн байгууллагад холбоогүй. Мөн нийт хүрээнд хэвлэл мэдээллийн байгууллагатай холбоотой хүн дээр мөрдөн шалгах ажиллагаа явуулаагүй байна. Тус хэрэг явдлыг нийтэд мэдээлсэн сэтгүүлч өөрийн ажил үүргээ гүйцэтгэсэн гэж ойлгож байгаа гэв. 

---