Жүдо бөхийн энэ оны хамгийн эхний томоохон тэмцээн болох Парисын их дуулга тэмцээн эхлэхэд хоёр хоног үлдлээ.
Хоёрдугаар сарын 1-2-ны өдрүүдэд Франц улсын Парис хотноо жүдо бөхийн уламжлалт Парисын их дуулга тэмцээн зохион байгуулагдана. 54 улсын 317 жүдоч хүч үзэх мэдүүлгээ өгөөд байгаа бол манай улсаас үндэсний шигшээ багийн дасгалжуулагч Г.Болдбаатараар ахлуулсан эрэгтэй тав, эмэгтэй долоо буюу нийт 12 тамирчин оролцоно. Манай багаас эрэгтэйчүүдийн -66кг жинд Мастерсийн алт, мөнгөн медальт Г.Хэрлэн хүч үзэх бол бусад тамирчид нь бүгд шинэ, залуу тамирчид юм.
Мөн түүнчлэн Арабын нэгдсэн Эмират улсын нэр дээрээс эрэгтэйчүүдийн -66 кг жинд өнгөрсөн оны Парисын их дуулгын хүрэл медальт Б.Нармандах, эмэгтэйчүүдийн -52кг жинд өнгөрөгч оны Абу Дабыгийн их дуулгын аварга, Токиогийн их дуулгын хүрэл медальт Б.Хорлоодой нар барилдахаар мэдүүлгээ өгөөд байна.
