Ерөнхий сайд Л.Оюун-Эрдэнэ "2028 оны сонгуулийг бүсчилж хийхгүй гээд нэр бүхий УИХ-ын гишүүд аймгийн засаг дарга нартай яриад явж байна. Парламентын гишүүд  өөрсдийн сонгогдох эрх ашгийн үүднээс бүсийн хөгжлөөс татгалзана гэдэг нь дэндүү харалган бодлого" гэж хэлэв.

Ерөнхий сайд Л.Оюун-Эрдэнэ:

-Нийслэл Улаанбаатар хотын асуудлыг 21 аймаг, бүсийн төвүүдтэйгээ хамт авч үзэж хөгжүүлэх нь чухал. Энэ ч агуулгаараа тойрог бүсчлэгдсэн. Том агуулгаар, аймгууд бие биедээ байгаа боломжийг харах боломж үүссэн. Наадмын өмнө бүх бүсүүдэд бүсийн зөвлөлийн хурал зохион байгуулагдана. Үүнд бүсээс сонгогдсон УИХ-ын гишүүд, Засгийн газрын гишүүд, аймгийн засаг дарга, хурлын дарга нар оролцоно. Ингээд зөвлөмж гаргана. Ингээд 2040 он хүртэлх нийслэлийг хөгжүүлэх ерөнхий төлөвлөгөөг уялдуулах агуулгаа танилцуулна. Гурван аймгийн ИТХ хамтарч хуралддаг байх үгүй юу гэдгээ ярилцана. Төсвөө яаж бүрдүүлдэг байх вэ? Төслүүдээ яаж хэрэгжүүлэх, орон нутгийн сангийн хэрхэн нэгтгэх зэргээ ярилцъя гэж байгаа.

2028 оны сонгуулийг бүсчилж хийхгүй гээд нэр бүхий УИХ-ын гишүүд аймгийн засаг дарга нартай яриад яваад байгаа юм билээ. Буцаад асуудал үүснэ шүү.Парламентын гишүүд маань өөрсдийн сонгогдох эрх ашгийн үүднээс бүсийн хөгжлөөс татгалзана гэдэг нь дэндүү харалган бодлого.

Хангалттай 34 жил явсан. Том агуулгаар нь өөрчлөх цаг болсон. Тэгэхгүй бол дахиад л 30 жилийн дараа энэ хэвээрээ байна. Бүс орон нутгаас сонгогдсон гишүүд маань үүн дээр анхаараарай гэж хүсмээр байна гэв. 

---