УИХ-ын чуулганы хуралдаанаар Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж байна.

УИХ-ын гишүүн О.Батнайрамдал:

-Монгол Улсад гарч буй хулгай луйвар, авлигын хэргүүд, баялгийн шударга бус хуваарилалтуудын ард төрийн өмчит компаниуд байдаг. Бид хуваарилалтын хүрээнд Үндэсний баялгийн сангийн тухай хуулиа баталж, байгалийн баялгаас орж ирж байгааг баялгийн сангаараа дамжуулж ард иргэддээ эдийн засгийн хүртээмж хүртээж, эргэлтэд оруулахаар баталлаа. Үүнийг амилуулах хууль бол Төрийн болон орон нутгийн өмчит компанийн хууль.

Төрийн өмчит компаниуд алдагдалтай ажиллаж байгаа нь улс төрийн томилгоо, гүйцэтгэх удирдлага буруу явсантай холбоотой. Тэгэхээр үүнийг өндөр хяналттай, ил тод, сайн засаглалтай явуулах ёстой.

Хуульд улс төрийн ямар нэгэн албан тушаалыг сүүлийн хоёр жил хашиж байсан хүн Төрийн өмчит компаниудын ТУЗ-д суухгүй. ТУЗ болон гүйцэтгэх удирдлага сонгон шалгаруулалт нээлттэй ил тод байх нарийвчилсан зохицуулалтууд оруулж өгсөн гэв.

---