ЭМЯ-ны харьяа Эрүүл мэндийн хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан П.Батчулуунд холбогдох хэргийг Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхийн шүүгч Г.Золбоо хэлэлцэн шийдвэрлэсэн талаар бид өчигдөр мэдээлсэн. Хүний гавьяат эмч П.Батчулууныг бусдын эд, эрхтнийг зөвшөөрөлгүй авсан хэрэгт буруутгасан билээ.

Тодруулбал, 2023 оны наймдугаар сарын 5-6-нд шилжих шөнө зам, тээврийн осолд орж, ГССҮТ-д хүргүүлэн ирсэн, тархины үхэлтэй гэдгийг нь мэргэжлийн эмч нар тодорхойлсон А-гийн биеэс шөрмөс, түүний бэхлэгдэх хэсгүүд, цөсний хүүдий, элэг, бөөр зэргийг авахдаа ар гэрийнхэнд нь тайлбарлан хэлээгүй, бодит байдлыг нуун дарагдуулж, хууран мэхэлж авсан хэмээн Баянгол дүүргийн Прокурорын газраас яллах дүгнэлт үйлдэн шүүхэд шилжүүлсэн. Өөрөөр хэлбэл, элэг, бөөр, түүний эргэн тойронд байгаа гол судсыг авах талаар хэлж зөвшөөрөл авсан боловч шөрмөс, түүний бэхлэгдэх хэсэг болох хүний доод мөчдийн эд, цөсний хүүдийг авах талаараа ар гэрийнхэнд нь мэдэгдээгүй гэдэг. Тиймээс П.Батчулууныг Эрүүгийн хуулийн 15.3-2 дахь хэсгийн хууран мэхэлж хүний эд, эрхтнийг авсан хэмээн яллагдагчаар тооцож, шүүхэд шилжүүлснийг өчигдөр хэлэлцээд уг гэмт хэргийг үйлдсэн гэм буруутайд тооцон, хоёр жил зургаан сарын хугацаагаар хорих ял шийтгэлээ. Түүнийг шүүх хуралд хохирогчийн хууль ёсны төлөөлөгчөөр талийгаачийн хамаарал бүхий хүн болох Д.Алтантуяа өмгөөлөгч Э.Мөнхзолбоо, П.Эрхэмбаяр, шүүгдэгчийн өмгөөлөгчөөр Б.Баяраа, Г.Оюунцэцэг, Б.Цэнгүүн, гэрчээр Б.Төрмөнх, Б.Төрболд, Э.Эрдэнэбаатар нар оролцсон байна.

Ийнхүү ял шийтгэсэнд эмч, эмнэлгийн мэргэжилтнүүд дургүйцлээ илэрхийлж, хүний амь аврахаар үүргээ биелүүлсэн эмчид ял өгч байгаа нь шударга бус явдал хэмээн үзэл бодлоо илэрхийлж байгаа юм. 

---