УИХ-ын намрын ээлжит чуулган өнгөрсөн долоо хоногт хаалтаа хийх байсан ч хэлэлцэх хэд хэдэн асуудал үлдсэн тул долоо хоногоор сунгаад байна. 

Энэ долоо хоногт УИХ-ын чуулганаар  Монгол Улсын Засгийн газар болон Бүгд Найрамдах Энэтхэг Улсын Экспорт-Импорт банк хоорондын Зээлийн хэлэлцээр соёрхон батлах тухай хуулийн төсөл болон хамт өргөн мэдүүлсэн хуулийн төслийг хэлэлцэн батлана. Өөрөөр хэлбэл Газрын тос боловсруулах үйлдвэрийн нэмэлт санхүүжилтын асуудлыг УИХ энэ долоо хоногт хэлэлцэн шийдвэрлэнэ. 

Мөн “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай” Улсын Их Хурлын тогтоолын төсөл,  Хархорум хотын бүтээн байгуулалт, хөгжлийг дэмжих тухай хуулийн төсөл болон хамт өргөн мэдүүлсэн хууль, тогтоолын төслүүд,  Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэн баталж, баасан гарагт хаалтаа хийхээр товтой байна. 

Өнөөдрийн хувьд УИХ дахь МАН, АН-ын бүлэг хуралдана. Мөн “Монгол газрын тос боловсруулах үйлдвэр барих төсөл”-ийн талаар шалган судлах, холбогдох санал, дүгнэлт гаргах, шийдвэрийн төсөл боловсруулах үүрэг бүхий хянан шалгах ажлын хэсгийн хуралдаан, Хархорум хотын бүтээн байгуулалт, хөгжлийг дэмжих тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцүүлэгт бэлтгэх үүрэг бүхий ажлын хэсгийн хуралдаан тус тус болно. 
 

---