Монголын хөл бөмбөгийн холбоо гадаадаас 40 тэрбум төгрөгийн санхүүжилт авсан атал уг санхүүжилт хөл бөмбөгийн спортыг хөгжүүлэх үйлсэд зарцуулагдахгүй байгаа аж. Уг асуудлаар спортын тайлбарлагч Б.Батзаяагаас тодрууллаа. 

Спортын тайлбарлагч Б.Батзаяа:

-Монголын хөл бөмбөгийн холбоо 1998 оноос хойш Олон улсын болон Азийн хөл бөмбөгийн холбоонд элссэн байдаг. Элссэн цагаасаа хойш байнга санхүүжилт авч ирсэн. Олон улсын хөл бөмбөгийн программд хөл бөмбөг хөгжил буурай орнуудад хөгжүүлэх төслүүд хэрэгжүүлдэг. 2016-2022 оны хооронд Монгол Улсын хөл бөмбөгийг хөгжүүлээрэй гээд 11,4 сая ам.долларын тусламж үзүүлсэн байна. Монгол төгрөгөөр ойролцоогоор 40 тэрбум төгрөг гэсэн үг. Мөн цар тахлын үед ч олон улсын холбооноос дэлхийн бүх улсын холбооддоо тусламж үзүүлсэн. 

Азийн хөл бөмбөгийн холбооноос мөн хөгжүүлэлт хийх 2 сая ам.долларыг 2025-2027 оны хооронд өгөх юм байна. Тэгэхээр энэ нэгдүгээр сард эхний санхүүжилт нь орж ирэх магадлалтай. Иймэрхүү байдлаар манай улсын хөл бөмбөгийн спортыг хөгжүүлэх маш их тусламж санхүүжилт орж ирж байгаа. Гэтэл манай улс хөл бөмбөгийн спортоор дэлхийн сүүлийн 30 улсын тоонд орж байна.

Дээр дурдсан Олон улсын хөл бөмбөгийн программаар Төв аймагт өвлийн нөхцөлд ч хөл бөмбөг тоглож болохоор битүү заал барьж өгсөн. Гэтэл тухайн заал барьцаалагдсан. Монголын хөл бөмбөгийг хөгжүүлээрэй гээд барьж өгсөн талбайг амралтын газар болгочихсон байна.

Монголын хөл бөмбөгийн холбооны тамирчин, ажилчид өөрсдөө шүгэл үлээж уг асуудлуудыг дэлгэхээр ажлаас нь халчихдаг. Холбооны ЕНБД-аар хөл бөмбөгтэй ямар ч холбоогүй хүнийг удирдах зөвлөл нь сонгосон. Өмнөх ерөнхийлөгч А.Ганбаатар, Ерөнхийлөгч асан Ц.Элбэгдоржийн зөвлөх байсан хүн. Энэ хүний үр дагавар одоо хүртэл тус холбоонд явсаар байна.

Маш их мөнгө эргэлддэг холбоо учир холдох сонирхолгүй хүмүүс Монголын хөл бөмбөгийн холбоог удирдаж байна.

Ээлжит их хурлыг зарлаж, УЗ-ийн 15 хүнээс ашиг сонирхлын зөрчилтэй хүмүүсийг солих шаардлага тавина.
Ийм их санхүүжилттэй хэр нь дээд лигт орж байгаа багуудынхаа шагналын мөнгийг өгч чадахгүй байна гэдэг нь тус холбоог дампуурсан байгааг илтгэж байна гэлээ. 

---