ЭХЭМҮТ-ийн Хүүхдийн эмнэлгийн Нярайн эмгэг судлалын тасгийн эрхлэгч Г.Батцэнгэл нярай хүүхдийн өвчлөлийн талаар мэдээлэл өгөв.

ЭХЭМҮТ-ийн Хүүхдийн эмнэлгийн Нярайн эмгэг судлалын тасгийн эрхлэгч Г.Батцэнгэл:

-ЭХЭМҮТ-ийн нярайн эмгэг судлалын тасагт өнөөдрийн байдлаар 76 нярай хэвтэн эмчлүүлж байгаа. Үүнээс  22 нь амьсгалын замын өвчлөл, уушгины хатгалгааны хүндрэлийн улмаас эмчлэгдэж байна.

Нярайд амьсгалын замын эмгэг өвчлөл нь хөхөндөө муу болох, биеийн халуун хэвийн биш болох, сүүгээрээ бөөлжих, шаралт нь эмгэг байдлаар тодорч гүнзгийрэх зэргээр илэрч байгаа. Нярайд дур мэдэн эмийн тунг хувааж өгч байгаа нь нярайг хөхөө хөхөж чадахгүйд хүргэх, амьсгаадах, цээж хонхолзох, зайнаас амьсгал нь шуугьж сонсогдох зэрэгт хүргэж байна.

Хөхөөр хооллолт нь амьсгалын замын өвчлөлөөс сэргийлэх нэгэн хүчин зүйл болж байдаг бөгөөд дан хөхөөр биш холимог хооллолттой, жингийн илүүдэлтэй, ээж нь жирэмсэн байх үедээ чихрийн шижингээр өвчилж байсан зэрэг тохиолдолд нярайн амьсгалын замын өвчлөл хүндрэх явцтай байгаа. Мөн асран хамгаалагч нарын аль нэг нь тамхи татдаг тохиолдолд дотоод орчны агаарын бохирдол үүсгэж, өвчлөлд нөлөөлдөг байна.

Нярайд эм бэлдмэлийг эмчид үзүүлэхгүйгээр дур мэдэн эмийн тунг хувааж өгч байгаа нь өвчлөл хүндрэх нэг шалтгаан болдог. Дур мэдэн өгч буй эмүүдэд гүнзгий хордлого үүсгэх бэлдмэлүүд агуулагддаг тул эцэг эхчүүд анхаарах хэрэгтэй гэв.

---